Shillong, Nailar, 30: U Myntri Rangbah ka Jylla ha ka sngi Baar ula ïathuh ba ka Sorkar Jylla ka la pyrshang ban pynstet na ka bynta ban pyntyllun ïa ka jingïakren ïasuk bad ka seng kieng atiar Hynñiewtrep National Liberation Council (HNLC).
“Baroh ki kam ki la ïaid. Ngi dang ïaleh katba lah ban pyntyllun ïa ka kam bad ngi dang pyrshang ban pynstet ruh khnang ba ka kam kan kham kloi,” u la ong Myntri Rangbah ha ka jingïakren bad ki lad pathai khubor.
Dang ha une u bnai, san ngut ki nongïalam bahakhmat ka Seng HNLC ki la wan poi ha nongbah Shillong na ka bynta ka jingïakren ïasuk.
“Ngi hap ban sngewthuh ba kano kano ka kam, kam lah ban shu urlong noh shen hynrei ka don ka jingsngewkhia na baroh ki liang bad ka jingsngew ruh kaba shongnia. Namarkata, ngi donkam ban shim lang ïa kine ki jingpynsngew khnang ba yn dup lah ban pyntyllun shakhmat ïa ka jingïakren,” la bynrap u Myntri Rangbah.
Haba pynpaw ba donkam ban sngewthuh bniah ïa kane ka kam kaba jwat, u Conrad u la ong, “ngi donkam ban ïatreilang na baroh ki liang bad ban ïoh ruh ïa ka jingshahniah katba ngi dang pyntyllun ïa kane ka kam.”
U la ong shuh shuh ba kane ka kam ka la sdang bad u la pynpaw ruh ka jingsngew skhem ba ka jingïakren kan sa sdang noh shen khnang ban poi sha ka thong kumba la thmu.
