Ha Mawprem pynbna u Dy. CM ban ai mar 5000 tyngka sha ki 4000 tylli ki longïing ba duk

Shillong, Nailar 30 : U Symbud Myntri Rangbah ka Jylla Bah Prestone Tynsong ha ka sngi Ba-ar u la pynbna ba ka sorkar kan ai jingïarap da ka song pisa haduh 4,000 tylli ki longiing ba duna ka ioh ka kot da kaba sdang shwa na Shillong West Constituency, Mawprem.
Ïa kane u Bah Prestone ba dei ruh u National Vice President ka NPP u la pynbna ha ka jingïalang pynskhem ïa ka kynhun treikam jong ka NPP Shillong West hapoh ka jingïalam jong u Rishan Rapsang kum u President uba dei ruh ha kajuh ka por u hynmen jong u MLA ba mynta ka Shillong West, Bah Mohendro Rapsang.
“Mynta ka kynti ka sorkar ka la rai ban ai beit man ka thliew iing mar 5000 tyngka, kata ha kito ki longiing kiba duna ka ioh ka kot. Ïa kane ngi kwah ban pyndep noh kham kloi. Na bynta kane ka constituency nga kyrpad ba phin pyndep noh kham kloi ban lum ïa ki 4000 tylli ki longiing kiba duk ba kin ioh ïa ka jingkyrshan pisa kaba mar 5000 tyngka,” ong u Bah Prestone.
Katei ka jingpynbna jong u Symbud Myntri Rangbah ka la pynlong ïa ki paidbah ba wan sha katei ka jingïalang ban pynpaw ïa ka jingkmen kaba khraw da kaba thapkti lang.
Kumta, u la kyntu ïa ka Committee kaba thymmai ban lum kham stet ïa ki kyrteng ban ioh ïa katei ka jingkyrshan pisa.
Ha kajuh ka por u la pyntip ruh ba shen kin sa sdang noh ïa ki projek bapher bapher na ka bynta ka Shillong West kynthup naduh ka jingpynitynnad ïa ka jaka ban rung sha ka constituency kata ha Kyrbom kaba la mang ha ka jinglut kaba kot sha ka 2.5 klur tyngka.
Nalorkata, u la pyntip ruh ba ka sorkar kala buh hakhmat eh na ka bynta ban buh ïa ki streetlight kumjuh ruh ban pynkhlain ïa ki bor pahara na ka bynta ban pyntikna ba ki paidbah kin im ha ka jingsuk jingshngaiñ.
U Bah Prestone u la ai ruh ka jingkitbok ïa katei ka Committee ba thymmai hapoh ka jingïalam jong u Bah Rishan Rapsang kin lah ban pynkhreh bha na ka bynta ka elekshon ban wan.
“Ïa u kyrtong jied hi phi na ka Block Shillong West bad ngin sa shu pynskhem beit,” ula bynrap biang.
Ha kane ka sngi la sakhi da ki hajar ngut ki nongshong shnong jong katei ka constituency kiba la poi sha katei ka jingïalang.
Shwa kane la ioh ruh ïa ka jingkren naduh u State President ka NPP, Dr. WR Kharlukhi nalor kiwei kiwei ki nongïalam ka party.