ïoh jingmyntoi palat 1,900 ngut ki khynnah pule ha ka ‘Softskill Training’ lyngba ka Aspire Megh

Shillong, Nailar :Ha ka jingpyrshang ban pynkhreh ïa ki khynnah samla ka jylla na ka bynta ka lawei jong ki, ka Sorkar Meghalaya, lyngba ka tnat treikam jong ka Sports & Youth Affairs, ryngkat ka jingïasnohkti lem ka tnat Education, ka la pynlong ïa ka prokram ‘Aspire Meghalaya’ ba la pyntreikam da ka AVENUES, Shillong.
Ha kaba ïadei bad kane, kila don haduh 1,917ngut ki khynnah pule na ki 9 tylli ki skul bad kolej ha ki distrik bapher bapher hapoh ka jylla kila ïoh kheit ïa u soh ka jingjop na ka soft skills bad talent identification prokram jong ka Aspire Meghalaya ha ka taïew ba la dep.
Ka jingthmu jong kane ka prokram ka long ban pyntbit ïa ki khynnah pule ha kiba bun ki liang shwa ba kin sdang wad kam wad jam, bad ruh ban pynshlur ïa ki ha ka ban sei ïa ki sap ki phong khnang ba yn ïoh ban pynïasnoh ïa ki bad ki skhim bapher bapher jong ka Sorkar Jylla.
Ha ka jingkren jong u ha ka graduation function ha Williamnagar, u Jagdish Chelani (IAS), Deputy Commissioner, East Garo Hills District, u la ong, “Ki khynnah samla jong ngi ki don ki sap kiba kyrpang haba nujor bad kiwei pat ki samla ka Ri jong ngi. Ki prokram kum ka Aspire Meghalaya ki lah ban ïarap ïa ki da kaba ai ïa ka rynsan ban pynpaw ïa la ki sap ki phong bad ruh ban pynshlur ïa ki ban khmih lynti ïa kaei kaei kaba bha tam na bynta ka lawei jong ki.” U la pynpaw ruh ïa ka jingangnud jong u ban ïasnohkti lem bad ki skul ki kolej hapoh ka distrik ban ai jingïarap ïa ki khynnah samla kiba thmu ban long IAS bad kumta ter ter.
Ka samla Ilarisa A. Lamin, ba pule ha ka Klas 9 ha St. Mary’s Higher Secondary School, Shillong, ka la ïoh shim bynta ha kane ka prokram bad ka la ong; “Ki jinghikai tynrai kum ka burom ka akor ki dei kiba ngi la tip lypa, hynrei nga sngewnguh ba lyngba jong kane ka prokram, nga la ïoh ïa ka lad ban puson kham bha ïa ka jingkordor jong kine ki jinghikai khamtam haba ngi praktis ïa ki ha ka jingim jong ngi kaba man la ka sngi.” Ka la pynpaw ruh ïa la ka jingsngewnguh sha ki trainer ba ai jinghikai, bad ba ka la ïoh shibun ki jingmyntoi ha kaba ïadei bad ka rukom kren rukom khana, rukom pyrkhat bad kiwei kiwei.
Ha ka jingkren jong u ha ka jingïalang ha Khliehriat, u Jonathan Shylla (MCS), ADC, East Jaiñtia Hills District, u la kren shaphang ki interview skill da kaba ai nuksa na ka jingim jong u ruh ha kaba ïadei bad ka kam jong u. U la ong, “Ka rukom pule puthi jong ngi ka pynleit jingmut tang ha ka ban pass ïa ki eksam, hynrei ngi klet ban ithuh bad pyndonkam ïa ki sap tynrai ba ki khynnah samla jong ngi ki la don lypa, bad ban pynkhreh ïa ki na bynta ka lawei jong ki.” U la ong shuh shuh ba nalor ka degree, donkam ruh ïa ki leadership skill bad communication skill ban kiew shaphrang ha ki kam ki jam bad ha ka jingim ruh. “Ka Aspire Meghalaya ka ai kum kita ki jait jinghikai bad nga ngeit ba phi la ïa ioh jingmyntoi shibun na ka bad ba phin pyndonkam thikna ïa kine ki jinghikai ba phi la ïoh,” u la kyntu ia ki khynnah.
Ka Aspire Meghalaya ka ai training ïa ki khynnah pule ha ka jingshlur (Confidence), ka rukom pyrkhatshai ïa ka lawei (Clarity), ka rukom pynïadei bad kren para briew (Communication) bad ka jinglah ban ïaid shaphrang lyngba ki jingeh bad jingïakynduh bapher bapher (Emotional Resilience).Kawei na ki jinghikai ba kongsan ka ïadei bad ka Career Exploration, lane ban ai jingtip kumno ban sdang jied ïa ki laiñ pule, ki kam ba ïadei bad kita bad kumno ban neh bad kiew shaphrang ha la ki kam ki jam.
Ka Kong SimiroyKhongtiang, ka nongshna phlim ba pawnam na Jaiñtia Hills, ka la ai mynsiem ïa ki khynnah ha Sutnga da kaba ong, “Nga la shah jop bunsien bad nga la leh shibun ki jingbakla ruh. Hynrei da ka jingangnud bad jingskhem jingmut, nga ïai beh ïa la ka thong. Ka jingim jong phi ka long kum ka jhad ïa kaba phi hap ban pynper halor um da kaba skhem jingmut bad pynkhlaiñ ïalade, namar tang maphi hi balah ban ïalam ïa ka jhad jong phi sha ka jaka ba phi thmu ban leit.” Ka la pynpaw ruh ïa ka jingsngewnguh ïa ki nonghikai kiba don lang ha ka function da kaba ong, “Nga long kumne kumba nga long, dei na ki nonghikai jong nga bad nga ai khublei ïa ki halor ka jingkyrshan jong ki ïa ki khynnah samla ha ka lynti ïaid jong ki.”
Ki 9tylli ki jaka pule kiba la pyndep ïa ka training jong ka Aspire Meghalaya ha kane ka taïew ba la dep ki kynthup ïa ka Williamnagar Government College bad Sacred Heart Higher Secondary School, Williamnagarha East Garo Hills; Jaiñtia Eastern College, Khliehriat bad Sutnga Presbyterian Higher Secondary School ha East Jaiñtia Hills; St. Mary’s Higher Secondary School, Shillong bad St. Anthony’s Higher Secondary School, Pynurslaha East Khasi Hills; St. Francis D’Assisi College bad St. Peter’s Higher Secondary School ha Nongstoiñ, West Khasi Hills; bad Government Girls’ Higher Secondary School, Tura ha West Garo Hills.