Nang lut ki MDC jong ka Congress, resaiñ sa u MDC ka Rambrai

Shillong, Lber 28 : Ka Congress ha ka sngi Nyngkong ka la duh sa uwei pat u MDC na KHADC, Bah Bajop Pyngrope uba la resaiñ noh da ka jingthmu ban leit ïasoh sha ka National People’s Party ha ka 31tarik mynta u bnai.
Utei u MDC ryngkat ki nongkitkam jong ka Rambrai Block Congress Committee dalade hi ki la leit sha Congress Bhavan ban aiti ïa ka shithi resaiñ ha ki nongïalam jong ka party. Ha kane ka sngi, shwa ba un aiti ïa ka shithi resaiñ na ka party, u Bah Bajop u la kynduh khuk bad u President jong ka Meghalaya Pradesh Congress Committee, Bah Vincent H Pala bad kren ruh katto katne.
Haba kren bad ki lad pathai khubor hadien ba la dep aiti ïa ka shithi resaiñ, u Bah Bajop u la ïathuh ba ka dawbah kaba pynlong ïa u ban mih na ka Congress ban leit sha ka NPP kadei namar u ïapbiej palat ïa ka jinglah jong kane ka sorkar ba mynta hapoh ka jingïalam jong u Conrad Sangma ban pynbeit ïa u pud u sam.
“Kumba 98 persen ki jaka khappud bad ka Assam kiba hap ha constituency jongnga ki hap lut sha Meghalaya,” ula ong da kaba ïaroh ruh ba dei tang kane ka sorkar ba mynta kaba la nud ban pynbeit ïa u pud u sam bad ka Assam uba la shu sahteng kumto la palat 50 snem.
Nalorkata, u ïathuh ruh ba kum u nongïalam jong ka Congress ha kine ki phra snem u la ïohi lut ïa ka thma pohïing bad ka rukom treikam ka bym itynnad satia ha ka sem Congress.
Katkum ka jingong jong u, ka ishu jied President MPCC kadei ka dawbah kaba la ktah haduh katta katta ïa ka party ha Meghalaya. U la ong ruh ba dang nyngkong jan baroh ki mon ïa u Bah Charles Pyngrope ban shimti kum u President hynrei ka long pynban mar khongpong.
Shuh shuh u la ong ruh ba ka party ka la bakla haduh katta katta ban sospon ïa ki san ngut ki MLA tang na ka daw ba ki leit kyrshan ïa ka sorkar MDA.