Shillong, Nailar 29 : U Myntri ba dei peit ïa ka tnad Urban Affairs u ma Sniawbhalang Dhar u la ong mynta ka Lah Sngi U Blei ba ka tnad jongu kan aiti ïa ka Blueprint ban pynkynriah ïa ki 342 ki long ïing na Them Metor sha ka High Level Committee ha ka 31 tarik mynta u bnai.
Haba ïakren bad ki nongthoh khubor u ma Sniawbha u la ong “ U Chairman jongka High Level Committee (HLC) u bah Prestone Tynsong, Symbud Myntri Rangbah ka jylla la khot ïa ka jingïakynduh ka HLC ha ka 31 tarik ban shim ïa ka rai ba khatduh halor ka Blueprint”.
Halor ka jingpyrshah ïaka jingthmu jongka sorkar ban ai 3 acre ka jaka hajan RP Chest Hospital ban shna ïa ka jaka sah kine ki Kharmetor, u ma Sniawbha u la ong “ Hooid ka don ka jingpyrshah bad kum ka sorkar kan ym leh pyrshah ïa kaei kaba ki paidbah kim kwah satia. Namar ka sorkar kan shim ïa ka jingmynjur lang jong baroh shwa ban shim ïa kano kano ka rai khamtam ha kaba ïadei bad ka jaka sah kine ki briew”.
Ha kajuh pat ka por ula kyntu pat ïa ki briew khamtam ïa ki nongialam ba kim dei ban ïaleh politik ïa kane ka kam. “ Sngewbha kynmaw kane ka kam dei ka kam politik kane ka dei ka jingeh kaba ngi dei ban ïatrei bad ïa pynbeit lang.Wat ïalehkai politik ba ka jingim jong ki briew namar ka politik ka dei ka subjek kaba ïapher bha katba kine pat ki dei ki mat ne ki kam ba dei ban ïatrei lang ban ïa pynbeit da ka jingïasngewthuh jingmut” ong u ma Sniawbha.
Ha ka 25 tarik Iaiong 2022 ka Harijan Panchayat Committee (HPC) la mynjur ba ka sorkar kan pynkynriah noh ïa ki na Them ïew Mawlong halor ka nongrim ba ka sorkar kan ai jaka 200 square meters na ka bynta kawei kawei ka long ïing bad kata ruh hapoh u pud u sam ka European Ward bad kumjuh ruh ban thaw hi da ka sorkar ïaki ïing ki sem ba kin sah.
Halor kane ka sorkar ka la rai ban bishar bniah bad ban wanrah daka blueprint. Halor kitei ki jingdawa pat u ma Sniawbha u la ong ba ka sorkar kan hap ban bishar bniah bha la kitei ki jingdawa ki dei kiba shonghok ne em.
U la ïathuh ba ïa ka ophis jongka Shillong Municipal Board la dep pynkynriah sha ka ophis ba la shu wai shipor bad ka sorkar ka dang pynkhreh pat ban pynkynriah ïakito kiba trei ha ki tnad sorkar sha katei ka quarter.Ka daw ba kham shim por ka dei namar ba ka tnad kam pat dep ïaka kaiphod bad shen tang shu dep yn sa leh noh ïa ka kam.
