Lada ka don pisa ban pynsyrwa ha ki tamasa, siew bainong kaba biang ïa ngi ruh : ong ki nongshet ja

Shillong, Nailar 29: Ki nongshet ja sngi na bynta ki khynnah skul hapoh ka shatri jong ka All Jaintia Midday Meal Workers Union mynta ka sngi ki la pynlong ïa ka jingïakhih shong kyllaiñ myngngor ba khlem buh por ha khmat jong ka ophis treikam ka MBOSE, Shillong hadien ba na ka liang ki Majistor ki la hukum ba ki dei ban kynriah noh na jaka pynïeng kali kaba don ha syndah ka Additional Secretariat ban dawa na ka sorkar kan kyntiew ïa ka bainong jong ki na ka 1000 sha ka 5000 tyngka shibnai bad ba ka sorkar kan pynbiang ia ki tyndon lyer shet na bynta ban shet ja ïa ki khynnah skul.
Haba ïakren bad ki katto katne ngut ki long kmie kiba wan shim bynta sha kane ka jingïakhih ki la ïathuh ba lada kheiñ bha ki ïoh bai bylla tang 33 tyngka eiei ha ka shisngi namar ka sorkar ka siew tang 1000 tyngka shibnai.
Ki la ong ba lada bun khynnah ha ki skul, ym pep ki hap ban shet ja ïa ka 20 ne 30 kilo, ar lai sien ne baroh shitaiew katkum ka jingdawa jong ki skul.
Kine ki long kmie ki la ong ruh ba lada nujor bad baroh ki kam bylla dei kane kakam kaba tad tam. “Pyrkhat lada phi bylla MGNREGA ruh ka siew 230 tyngka shisngi katba ma ngi pat tang 33 tyngka lada thied tang u let ba u rubber khun ka bainong ka la lut” ong kawei ka long kmie.
“Pyrkhat ngi ïoh jingsiew kaba tang 32 tyngka shi sngi hato ka sorkar kam lehrain ban siew tang katne namar ka kam kaba ngi leh ka pat kaba khia shibun” ki la ong. Haba ïakren bad u nong ai buit ka AJMDWU u Khroo L Pariat ula ïathuh ba ki la pynsngew ïa kane ka jingdawa sha ka sorkar naduh u 2019 bad u la ong ba ki la buh jingthoh la hynriew sien mynta sha u Myntri Rangbah ka jylla bad sha ki ophisar ruh hynrei kat haduh kane ka por kim pat ïoh satia ïa kano kano ka jubab kaba shai namar ka daw kaba ki ai ka long ba kane ka jingdawa jong ki ka dang sahkut beit ha ka tnat pla tyngka.
Shuh shuh u la ong ruh ba ka sorkar ka dei ban ai da ka jubab aba shai la kan sngap ïa ki jingdawa jong ki ne em bad lada kam pynurlong ruh ka dei ban pyndam syndon noh ïa kane ka skhim ai ja sngi sha ki khynnah skul.
U la bynrap ba ka sorkar ka dei ban ai jingïarap ruh ïa ki wat ha ka por tlang, namar lada khang skul, ki nongshet ja sngi kim ïoh bai bylla eiei bad kumta ki la kyrpad ruh ba dei ban ai lem wat ha ki bnai tlang ruh namar bym don lad shawei.
Shuh shuh u la ong ba ka sorkar ka ïai ïalap sha ki briew badei ban pynneh pynsah ïa ka mariang hynrei kam shym leh eiei halor ka jingdawa jong ki ban ïoh shet noh da ka Gas haba shet ja ïa ki khynnah skul.
“Ngi lah donkam da ka gas, mynta ngi thang beit tang da ka dieng, kawei ka jingeh ka long namar ba ka kham shim por, kan long ka jingïarap ïa ngi ban pynkloi kam lada ïoh thang gas bad kan long ruh kum shi bynta ban pynneh pynsah ïa ka mariang,” u la ong.
Ha kaba ïadei bad ka jingshait kam ka sorkar ba kam don pisa u Bah Khroo u la ong “Ka sorkar ka ïoh pisa ban pynlut ha ka tamsa da ki 14 klur tang ha ki tamasa balei kam pyndonkam da kane ka pisa ban siew bai nong sha ki ha jaka ban pynsyrwa tang ha ki tamasa”.
Ha kane ka jingwan jingïakhih kine ki nongshet ja sngi la sakhi ruh ba kawei na ki dkhot ka seng ki nongshet ja sngi ka ka la wan shim bynta lang ryngkat bad i khun rit ba dang kumba 5 bnai eiei. Haba kylli ïa lka daw ba ka wan shim bynta ryngkat i khun rit, ka la ong ba kam banse ban hap ïalam lang ïa i khun rit namar bym don nong peit ha ïing, bad namar ba dawa ka kpoh hap ban ïa mih lem ryngkat bad kiwei ki dkhot kum ka jingiaryntih lang ha kane ka jingïakhun ban ïoh ïa ka hok.