Shillong, Lber 28 : U Myntri ka tnad C&RD, Bah Hamletson Dohling ba dei ruh u MLA ka Mylliem ha ka sngi Nyngkong u la pyllait paidbah haduh 28.25 lak tyngka sha ki 41 tylli ki kynhun jong ki nongrep lane ki Producers Group kaba wan lyngba ka prokram jong ka FOCUSS.
Haba kren ha katei ka jingïalang, u Myntri u la ong ba katei ka dei shi bynta ba kum ka sorkar bad kum u nongmihkhmat ki ïakhun ban plie lad ïa ki nongrep ba kin lah ban pynkhlaiñ ïa ka rep ka riang khnang ba ka jingmyntoi kan dei na bynta jong ki hi.
Ha kane ka prokram ba la pynlong da ka ophis jong u BDO Mylliem ryngkat ka Enterprise Facilitation Centre (MBDA) Mylliem Block ha Conference Hall jong ka MAMETI, Upper Shillong la donlang ruh u BDO ka Mylliem Bah PT Passah, Dr. S Nongdhar, VDO Veterinary Department, Bah Stephan Lyngdoh Chairman BDMC Mylliem lem bad ki Rangbah Shnong bapher bapher kynthup ia ki dkhot jong ki 41 tylli ki producers group kiba dei na ka Mylliem Block.
Na ka liang u Myntri hadien kane u la plie pyrda ruh ïa ka projek Lemongrass jong ka Mawklot Farmer Producer Company Limited. Lyngba katei ka projek, ki nongrep ki lah ban pynïaid iew ïa kitei ki kynja phlang kiba kham pher bad lah dor bha.
