Aiti ka MPCC ha ka Mawlai Congress ban jied ïa u kyrtong elekshon 2023

Shillong, Lber 28 : Ka Meghalaya Pradesh Congress Committee (MPCC) ka la aiti ha ka Meghalaya Block Congress Committee (MBCC) na ka bynta ban tyrwa ne jied ïa u kyrtong ban aireng na ka party ha ka elekshon MLA kaban long ha u 2023.
Haba pyntikna ïa kane hadien ka jingpdiang burom biang ïa u Bah Marbud Dkhar sha ka party, u Working President ka MPCC, Bah PN Syiem u la ong, “Ngi la aiti beit ha ka Mawlai Block Congress ban jied ïa u kyrtong na ka bynta ka elekshon 2023.”
Jan baroh ki nongïalam jong ka Congress kynthup naduh u President Bah Vincent H Pala ki la hiar sha Mawlai hynne ka sngi ban pdiang burom biang sa shisien pat ïa u Bah Marbud Dkhar ryngkat ki nongbud sha ka party.
Haba kren ha ki lad pathai khubor, wat na ka liang u Bah Marbud ruh u ong ba na ka liang ka Mawlai Congress kin sa phah da ka kyrteng jong u kum u kyrtong ha ka elekshon ban wan namarba ki la artatien ba u MLA jong ka party Bah PT Sawkmie un ïakhun biang na ka Congress.
U Bah Marbud udei u u kyrtong jong ka Seng Congress ha ka elekshon MDC ha u 20129, hynrei u la shah rem ha u Bah Teibor Pathaw.
Kumban shu kdew hangne, u MLA ka Mawlai, Bah PT Sawkmie u la dei uwei na ki san ngut ki MLA jong ka Congress kiba ngat ha ka jingshah sospon ha ka MPCC na ka daw ba ki leit ban kyrshan ïa ka sorkar MDA ba ïalam da ka NPP.