Nongpoh, Nailar 29: U MLA ka Nongpoh hadien ka jingkular ban ai khusnam ïaki samla pule kiba pass bha bad wan shakhmat na Ri-Bhoi College, mynta ka sngi u la ioh ban ai khusnam kyrpang ïa kawei ka samla pule jong katei ka college kaba wan haka kyrdan ba nyngkong haka subject Education haka eksamin bala pynlong da ka NEHU ha u snem 2020.
Katei ka samla ka dei ka samla Daphira Khymdeit kaba kum ka samla pule ha katei ka college kala pynpaw ka jingsngew sarong ba dei lyngba ka jingtrei shitom jong ka bad ki nonghikai ba kala lah ban poi sha ka thong kaba don ka jingangnud ban dang bteng shuh shuh ban minot haki jingpule ba kham shalor.
Na ka liang u Bah Mayral Born ha katei ka sngi u la aiti ruh da ka song pisa kaba T.20 hajar sha katei ka samla Daphira Khymdeit halor ka jinglah jong ka ban lehbha haka eksamin kaba long ruh ka jingsarong kaba khraw ïaki kmie ki kpa bad ka college baroh kawei.
U Bah Mayral Born Syiem u la pynpaw ba katei ka khusnam ka dei kaba u la kular naduh ki snem bala leit noh ba un ai da ka khusnam pisa sha ki samla pule ka Ri-bhoi College kiba lah ban wan shakhmat bad lehbha haki jingpule jong ki bad ïa katei ka khusnam kum u MLA un dang bteng ban ai ha ki snem ban wan sha ki samla pule kiba lah ban wanrah ïaka nam bad burom ïaka college.
