Ka Jylla Meghalaya ka la donkam ban don noh la ka jong ka State University, ong u MLA ka Nongpoh

Nongpoh, Nailar 29 : Ban dang kyntiew ïa ka pule ka puthi hapoh ka jylla bad kumjuh ruh ban dang lah ban plie lad ïa shibun ki samla ka jylla ba kin ioh lad ban dang pyntbit sha ki kyrdan ba kham shaneng, u MLA ka Nongpoh u la pynpaw ba ka jylla Meghalaya ka la donkam ban don noh la ka jong ka State University, nalor ba la don lypa ka North Eastern Hills Univeristy (NEHU).
Na ka liang u MLA ka Nongpoh u la kren halor kane ka jingdonkam ban don sa ka State University, ka dei ha ka jingïalang kaba u la leit ban shim bynta kum u kongsan ban pynkup burom ïa ki 325 ngut ki sala pule ka Ri Bhoi College kiba la pyndep ïa ka Graduation kaba la pynlong mynta ka sngi ha katei ka College.
“Kumba long haduh mynta ka jylla Meghalaya ka dang don tang ka North Eastern Hills University ha kaba ïa kane ka skulbah la peit la khmih da ka sorkar kmie bad teng teng ki mih ki huri hura hapoh kane ka skulbah ka dei namar ba ïa u shabi la bat na Delhi”ong u Bah Mayral Born Syiem, MLA ka Nongpoh.
U la ong ruh lada lah ban pynurlong na ka bynta ban wan rah sa ïa kane ka State University hapoh ka jylla, ka jingmyntoi ka dei na ka bynta ki khun samla jong ka jylla bad kumba paw pyrthei haduh kine ki sngi bun ki samla ki hap ban sangeh noh na ka jingpule hadien ba ki la pyndep ïa ka Graduation namar ka jingduna ka bha pule ha katei ka skulbah kaba la don lypa hapoh ka jylla.
Namarkata, u la pynpaw ruh ka la dei ka por ba ki nongmihkhmat ka jylla ryngkat kiwei ki riew rangbah ne ki reiw shemphang ka jylla ki hap ban ïa kren sani halor kane ka bynta bad kum ka jylla ka la dei hok ban don la ka jong ka State University kaba long ka jingmyntoi kaba khraw na ka bynta ki khun samla ka jylla bad khamtam kito ki samla kiba wan na ki longing longsem baduk ba kyrduh, u la bynrap.
Shuh shuh, u la pynpaw ruh da kaba ong ba kum u Nongmihkhmat paidbah u don kata ka jingangnud ba ka sorkar kan kham ban khia halor ka pule ka puthi ki khun samla bad u la pynpaw ruh kum u nongmihkhmat u la ju kren ruh na ka bynta ban wan rah noh ïa ka Medical College ha Ri Bhoi kaba dei kawei na ka Aspirational District, hynrei kaba kham sngewsih ka long ba bun ki kynnoh ba kane ka dei tang ka jingpyrta ha ri khlaw ha kaba wat la katta ruh un dang ïai pyrshang ban ïa kren halor kane ka bynta bad u pan ruh ka jingkyrhan na ki paidbah ka jylla.