Shillong, Lber 28: Ka Ïingkashari POCSO hynne ka sngi nyngkong, kala hukum ban set along shirta jongim ïa u Pulit Sub Inspctor bala shah beh kam, halor ka jingdonkam ban leh beijot ïa ki arngut ki shipara hapoh thanad.
Une u Sub Inspector ba kyrteng u Nurul Islam ula leh beijot ïa kine ki shipara hapoh Ampati Police Station ha u snem 2013. Kka Kashari POCSO kala pynngat kam bymman ïa une u Heh Pulit ha ka taiew bala lah, bad pynbna ïa ka jingpynsajia hynne ka sngi.
Ka Ïingkashari kala hukum ban set along ïa u Nurul Islam ha ryngkat bad ka kuna ba T. 8 lak ka ba dei ban siew sha ki lanot.
La pynshisha ïa ka jingleh bymman une u Heh Pulit kat kum ki kyndon bad jingpynsajia hapoh ka POCSO Act, 2012 bad ruh ka IPC Act, ong ka Ïingkashari POCSO ha ka hukum ba pynmih ha ka sngi palei bala lah.
U Nurul Islam ula leh beijot ïa iwei i Khynnah 14 snem ha Ampati Police Station myn ha ka 13 tarik Lber bad 14 tarik Lber 2013. Ha ka 31 tarik Lber pat, ula leh beijot sa ïa ka hynmen ba 17 snem ka rta da kaba pynap pistol, kaba pynlong ïa u Kpa jong kine ki Khynnah ban ujor da ka ejahar pyrshah ïa une u Heh Pulit.
U Kpa ha kane ka ejahar, ula kynnoh ba u Nurul Islam ula byrngem ban pynïap ïa kine baroh arngut ki shipara bad ruh ban pynngat ïa ki ha ki kam bymman lada ki pyntip briew ïa ka kam ba ula leh.
U Nurul Islam u dei u Sub Inspector uba la shah weng na ka kam ha u snem 2013 hadien kane ka jingjia bad u dei ruh u Heh Pulit uba ar na kiba shah wengkam halor ka jingdonkti ha ki kam leh beijot.
U Pulit ba nyngkong ban shah wengkam udei u Sub Inspector S.N Roy uba donkti ha kaba leh beijot ïa ka khyn nah skul ba 13 snem ha kawei ka hotel hangne ha Nongbah Shillong, kaba la jia ha ka 17 tarik Lber 2011.
