Sha Ladakh yn leit ai reng ñiah Saikil UCI MTB u samla Maitshaphrang, noh synñiang ka HYC

Mawkyrwat, ‘Nailar, 27: Ka Hynñiewtrep Youths’ Council (HYC) jong ka South West Khasi Hills District ka la ïoh ban pynlong ka jingïalang kum ka dak ban ai mynsiem bad ki kyntien jingkitbok kitrwiang ryngkat ka jingnoh synñiang na ka bynta u samla Maitshaphrang Kharwanniang na ka shnong Kenïong, South West Khasi Hills District u ban sa leit mihkhmat sha ka Union Cycliste Internatio-nale (UCI) Mountain Bike (MTB) Eliminator World Cup 2022 ka ban sa long ha Ladakh, India ha ka 04 tarik u bnai ‘Nailur, 2022.
Haba kren ha ka jingïalang ba lyngkot, u President ka HYC, South West Khasi Hills District, u bah Arbok Kharjahrin bad u Vice President ka HYC, South West Khasi Hills District, u bah Mandilous Nongbri ki la ai ki kyntien jingkyrkhu kyrdoh na ka bynta u samla Maitshaphrang Kharwan-niang ha kaba ha kine ki khyndiat sngi un sa mih ban leit ïashimbynta ha ka Union Cycliste Internat-ionale (UCI) Mountain Bike (MTB) Eliminator World Cup 2022 ka ban sa long ha Ladakh. “Ai ba ka jingleit jong phi, phin sa ïoh ban ïalehkai bha bad pyni shisha ïa ka sap ka phong ba phi phi don lyngba ka jingdon ryngkat U Trai Kynrad na jrong bad phi sa wan rah burom ym tang ïa lade shimet, hynrei ïa ka ïing ka sem, ka shnong ka thaw, ka distrik bad ka jylla hi baroh kawei”, ki la ong.
Ki la ong ruh ba haba u leit ban mihkhmat ha kane ka jingïalehkai kynmaw ban long borabor u briew uba sngewrit, burom ïa kiba halor bad pynkohnguh ïa ki nongpynïaid khnang ba un nangkiew na kawei ka kyrdan sha kawei pat.
Ha ka jingkren jong u samla Maitshaphrang Kharwanniang u la pynpaw ka jingaikhublei na ka bynta ki nongïalam jong ka HYC, South West Khasi Hills District kiba la shim ïa kane ka synjam ban ai ki jingkyrkhu kyrdoh bad ki kyntien jingaimynsiem na ka bynta jong u shwa ba un sa leit sha ka UCI MTB Eliminator World Cup 2022 ha Ladakh. Namarkata, u la pynpaw ruh ki kyntien jingkyrkhu kyrdoh kylliang ïa ka seng ba kan nangïaid shaphrang ha ki kam baroh ban peit na ka bynta ka bha ka miat ha ka imlang ka sahlang.
U la ïathuh ruh ba ka jingïoh bynta jong u ha ka UCI MTB Eliminator World Cup 2022 ha Ladakh ka dei lyngba ka jingdon jong u ha ka ‘Silver Medalist’ ha ka Cycle Race jong ka 4th Meghalaya Games 2022 kaba la long shen ha Nongbah Shillong. “Ym tang ma nga marwei ba ki jied, hynrei don uwei pat napoh jong ka Eastern West Khasi Hills District, u samla Kevin John Khyllait”, la ïathuh u samla Maitshaphrang.
Ha kane ka sngi ïa ka jingïalang ai mynsiem la pynïaid ïa ka jingïalang da u bah Kyrmen K. Ryja, General Secretary ka HYC, South West Khasi Hills District ha ryngkat ka jingïadonlang kiwei de ki para dkhot jong ka seng.