Rambrai, Nailar, 26: Ki katto katne ki rangbah bad ki samla jong ka thaiñ Rambrai Jyrngam ki la ai ksai, ba kan kham bha ïa u bah Kimfa Marbaniang ba un ïakhun, un ïalam ïa ka UDP bad ba un aireng na kane ka party riew lum na Rambrai, ban ïa kaba un leit pynïasnoh bad ka NPP. Namar la ong ba ha ka jingïohi jong kiba bun, ka NPP kan nym lah ban suh thied ha Rambrai.
“Ki daw kiba bun ba ki nongshong shnong jong ka thaiñ Rambrai kim da sngew tynnad ïa ka rukom ïalam jong ka NPP ha kane ka sorkar MDA. Ki bun ki thliew ba pei hapoh ka jingïalam jong ka NPP”, ong u ka kyrwoh ba ki la phah sha u nongthoh khubor mynta ka sngi.
Ka kyrwoh ka la ong ruh, “Ngi ïohi ka jingmih surok jong ki nonghikai Adhoc bad ki SSA ka long ka jingjah burom ïa ka akor jong ka jylla, namar kim kheiñ snep shuh wat ïa ka pule ka puthi ruh. Nangta ka jingkular ka jong u Myntri Rangbah u Conrad Sangma ka la long sha ba palat liam. Hynrei ynda peit ïa ki soh pat kim da poi shaei shaei ruh, ki bun bha ki Loop hole jong kane ka MDA ba la ïalam da ka NPP”
“Haba ngi phai sha ka rep ka riang lei ngi I ba ngi ki nong Rambrai Jyrngam ki la shah leh beiñ palat palat. Ngi shah khñiot ha ki bar jylla ïa ka business, kaei kane ka sorkar ka la leh. Ki jingkren khyllew jong u MDC bah Bajop Pynrope lei, la I kynroi prie tang ban sngap bad la I lehraiñ palat ba u la shu padiah khlem bai wai”.
“Haba ngi phai pat sha ka suk ka saiñ bad ka rukom treikam, ngi I ba ka UDP kan kham bha ïa u bah Kimfa Marbaniang, ba un ïalam noh ïa kane ka party ban khyllie pat, namar ngi ïohi ba ka UDP mynta ka kynti ka don ïa ka lad ba kan ïoh bun ki seat ha u 2023”.
“Kawei ruh katkum ka jingïohi ki nongshong shnong ka Rambrai, la donkam ïa ka regional party. Namar ka Garo ka la dep phiah lypa ha ka jingmih pyrthei jong u Sir RG Momin u retired officer jong ka West Khasi na ka Independent. Kane ka jingmih jong u Sir Momin kan pyntlot ïa ka NPP na ka thaiñ Rambrai. Dei kata ka daw ka kabu ksiar ïa u bah Kimfa Marbaniang MLA ba un ïa syllok bha bad ki riew rangbah bad ki samla ban thaw thymmai ïa ka party UDP na Rambrai Jyrngam constituency”.
“Kane ka dei ka kabu ksiar ïa u bah Kimfa ba un ïoh biang ïa ka jingjop sa shisien, hynrei lada un ïakhun na ka NPP kan long kaba jwat ïa u ba un ïoh ïa ka jingjop, namar ba bun kim da sngew tynnad. Ka seng riew lum bad ka seng congress ka long kaba la suh thied bha hapoh ka constituency Rambrai. Hynrei bun ki riew rangbah kiba kloi ban bud ïa u bah Kimfa Marbaniang MLA, lada u kloi ban mih pyrthei bad ban thaw thymmai ïa ka party riew lum”, ong u Bah Wanphai Dkhar uwei na ki samla nongïalam jong ki samla UDP ha West Khasi Hills.
