Nongstoiñ, Nailar, 26: Ka KSU Sengkmie ha ka jingïalam u samla Manly Nongpluh Finance Secretary Sengkmie, ba la don lang u samla Rapborlang Nongrum Assistant Finance Secretary, u samla Spaindarsing Lyngkhoi Office Secretary ka Sengkmie, samla Johny Khongsit Organising Secretary Mawlai Circle bad u President ka KSU West Khasi Hills District Unit I Samla Johnfisher Nongsiang, u samla Mixz Samakha Finance Secretary KSU West Khasi Hills District Unit, ha ka sngi thohdieng ki la hiar ha ka shnong Nongspung West Khasi Hills, ban kner jingïarap sha ka skul FGEM ka skul kaba tbeh jingshai ha ka dong ka thaiñ.
Ha kane ka sngi la ïoh ka lad ban ïadon ryngkat lang bad baroh ki khynnah skul, ki nonghikai bad kumjuh u Principal jong katei ka skul. Na ka liang u samla Rapborlang Nongrum u la shim ïa ka bynta kum u shongknor ban pynïaid ïa ka jingïalang bad la ïoh ban ai jingkren lyngkot na u samla Johnfisher Nongsïang, u Principal bad kiwei.
U samla Manly Nongpluh haba ai jingkren u la sneng la kraw, u la pyni ïa shibun ki jingeh ha kaba ïadei bad ka pule puthi, ba ka Jaitbynriew ka duna bha ki samla kiba wan shakhmat ban jop ïa ki exam IPS, IFS bad kiwei kiwei ban tynrong ïa ki post ki ba heh ha la kajong ka Jylla. Kumba jia mynta ka Jylla ka shu shim wai na kiwei pat ki jylla kiba dei ki mynder, dei na kata ka daw ba kine ki mynder ki ïoh lad ban takraiñ ïa ka Jaitbynriew katba mon.
Haba phai pat sha kawei pat ka liang u la ai mynsiem ïa ki khynnah skul, ki nonghikai bad khamtam ïa u Principal, u ba trei shitom naduh ba sdang haduh ba u soh ka jingtrei shitom ka la phalang ha baroh kawei ka Jylla. U la kitbok kit rwiang ba kane ka skul kan nang heh nang san na ka snem sha ka snem, lyngba ka jingtrei shitom ki khynnah skul bad ki Nonghikai, khnang ba kane ka dong ka thaiñ kan phalang ha jingnang jingstad.
