Shillong, Lber 29 : Mynta ka sngi ka Meghalaya Pradesh Congress Committee (MPCC) ka la pynthikna hi ba u bah Process T Sawkmie um dei shuh u kyrtong jongka ha ka Election MLA 2023 namar ki la pdiang burom ïa u bah Marbud Dkhar bad ki nongbud jongu ban sha ka Congress mynta ka sngi bad la sngewthuh ruh ba un dei ma u u kyrtong ka Congress ha ka Mawlai Constituency.
Ha ka jingshisha u bah Process T Sawkmie kat haduh mynta ka sngi u dang dei u MLA jongka Congress hi wat la u la shah sospon ruh namar ka MPCC ka dang ap beit ka jubab na u bad ki saw ngut kiwei ki MLA kiba la leit ban kyrshan ïa ka sorkar MDA da kaba kynnoh ba ki ïatrei lang bad ka sorkar kaba don ka BJP.
Hooid kine ki san ngut haduh mynta ki khlem jubab ïa ka jingpan jingpynshai jongka MPCC bad mynta lei lei la ïathuh ba kin ym jubab shuh hi ruh namar ki nongïalam ka MPCC ki la nang ïaid shakhmat ban pynthymmai ïa ki Block Congress Committee kumba ki la leh mynta ka sngi ha Mawlai.
Tangba ka tyllong khubor kaba la ïoh ka ïathuh bad pynthikna ba wat la u bah Process u dang don bad ka Congress haduh mynta hynrei ka shu long tang ka nam katba ka kam pat ka la nang ïaid shakhmat namar ha u 2023 un ïa aireng noh na ka UDP ha Mawlai Constituency.
