Shillong, Lber : Ka lyer ka ba jur ka ba la wan kynsan kynsan ka la syllad tyngeh ïa ki bynta jong ka dong Nongkya hapoh Mawsiatkhnam bad ka ba la pynjulor ruh ïa kawei ka ïing ka ba don ha kane ka dong.
Kane ka longïing ka ba la mad ïa kane ka jingiia ba sngewsih ka dei jong ka Kong Mary Josephine Kharumnuid kaba shong basah ha dong Nongkya, Mawsiatkhnam.
Ha ba kren sha u nongthoh khubor ka Kong Mary ka ïathuh ba ka lyer ka ba jur bha ka la wan syllad kynsan kynsan ha kane ka sngi Saitjaiñ ba la lah ha ka por mynsngi ha ka ba ka la lied ruh ïa ka tnum ïing jong ka, bad ki don ruh ki bynta ba ki dieng kanshi ki la lait bad la orpait.
Nalor kata ka iathuh ba ha kane ka jingjia iwei i khun ba ar snem jong ka ruh i la mynsaw malu mala na ka jinghap u maw na tyrpeng ba la mih na ka jingpra u dieng kanshi.
Kumta ha ka ba ïa dei bad kane ka jingjia hadien ka jingud jingnam jong kane ka longïing ryngkat bad u rangbah dong ka Nongkya bah K. Marbaniang, hynne ka sngi na ka liang u MLA ka Mawlai u Bah PT Sawkmie u la ai jingïarap da ka song pisa sha kane ka longkmie na ka bynta ki jingdonkam kyrkieh jong ka ka ba u la ai ha ophis treikam jong u ha Nongpdeng.