Lum jingïalang ki nongïalam shnong ka thaiñ Block II
Shuwa ban sdang ka jingpynbeit pud ha ka wat ba ar
Nongpoh, Nailar 25: Ki nongïalam shnong jong ka thaiñ Block II ha Ri-Bhoi hapoh ka lama ka Synjuk ki Rangbah Shnong ka Raid Nongtung, Ri-Bhoi District haka sngi Balang kila lum syndon da ka jingïalang jong ki nongïalam shnong ha katei ka thaiñ khappud haka shnong Mawlasnai naka bynta ban ïakren bad ban ïatai sani ha shuwa ba ki bor sorkar jong ka Meghalaya bad Assam kin sdang ïaka jingpynbeit pud haka wat kaba ar bad ban sdang ruh ban thaw noh ïaki Regional Committee shen kumba la pynbna da ki 2 myntri rangbah ka jylla Meghalaya bad Assam haka jingïalang kaba la long ha ka sngi u Blei ha Nongbah Guwahati.
Naka liang u Bah Blik Sohtun ba dei ruh u President ka Synjuk ki Rangbah Shnong jong ka Raid Nongtung u la pyntip ba katei ka jingïalang ba kyrkieh la khot ruh ïaki nongïalam shnong ha katei ka thaiñ Block II ha shuwa ba ki Committee pynbeit pud kin sdang ïaka kam pynbeit pud haka wat kaba ar ban pynlong ruh ki jingjurip bad ki jingwad bñiah ïaki jaka puta bad ki khyndew ki shyiap jong ki paidbah nongshong shnong ka jylla Meghalaya.
Ha katei ka jingïalang naka liang ki nongïalam shnong kila ïa tai ruh ba kam dei ban don kano kano ka jingsngewpher jingmut ha kaba ïadei bad ka jingpynbeit pud khnang ba ka jingangnud bad ka jingphohsniew jong ki paidbah ka thaiñ khappud kaba da ki phew snem kan sa urlong noh shen ban ioh noh ïa u pud u sam ba pura.
Halor ka kam pynbeit pud, naka liang ka synjuk ki Rangbah Shnong kala ai ka jingïaroh ïaka sorkar jylla kaba la shimkhia ban pynbeit ïa u pud u sam hapdeng ka jylla Meghalaya bad Assam haka wat kaba ar bad khmih lynti ba katei ka jingpynbeit pud kan long kaba seisoh bad kaba pynhun ïaki paidbah ha katei ka thaiñ da kaba kyntu bad kyrpad ruh sha ka sorkar jylla ba ki shnong khasi kim dei ban duh kumba la ïakren hynrei ba kidei ban shah kynthup haka jylla Meghalaya katkum ki kot ki sla bad ki riti dustur naduh mynbarim, ryngkat ka jingkyrpad ruh ïaki kynhun sengbhalang bapher bapher ba kin ai ka jingïatreilang ha katei ka jingpynbeit pud.