Jowai, Lber 28: Ka Myntdu Pynthorneiñ Far mers Welfare & Producer Organization (MPFPO), kaba dei ka seng jong ki nongrep kba, rep jhur bad ki trai lyngkha ha Myntdu Pynthorneiñ ha ka 26 tarik une u bnai kala sam biang ïa u symbai Kba uba kyrteng u CAU R-1 uba la nang pynroi shuh shuh na ki nongrep kiba la rep ïa u naduh mynshem snem 2021.
Une u symbai kba CAU R-1 u dei uba ki nongrep kila ïoh na u Prof NB Singh ka College P.G & A.S, Umïam Ri Bhoi District, ka Central Agriculture University, Imphal Manipur bad ïa uba la rep ha Myntdu Pynthorneiñ bad ha Mukhla naduh mynshem snem 2020 bad u dei u kba uba seisoh bha wat hapdeng ka jinghiar palat u slap bad jingsyllad ka lyer kumba jia ha ki snem ba mynshwa.
Hashwa ban sam ïa une u symbai kba CAU R-1, la ïoh ïa ka jingkren na u Ma KL Pariat u nongaibuit aibor bad nongprat lynti jong ka seng, uba la pynpaw ïa ka jingsngewnguh ïa ki nongrep kba nongrep jhur, kiba dei ki nongpynim ïa ka Mei ramew bad khamtam kiba pynneh pynkhlaiñ ïa ka wah Myntdu bad ka Tyrchi ba tuid na shnong khliehtyrchi sha wah Myntdu.
Watla hapdeng ka jingeh jingshah lehbeiñ ki nongrep ki trai lyngkha na ka jingbtet pathar ki briew ïa ki plastic nuit bad sa ka jingbym ïoh ïarap na ki bor ka sorkar myn ha kane ka jinglynshop ka bor mariang ïa ki lyngkha bad ki nur um.
Ha kajuh ka por u la kyntu ïa baroh ki nongrep ba kin long kiba ïa ryntih lang khnang ban dang lah ban pynkhlaiñ ïa ka kam rep Kba rep Jhur, kumjuh la kyrpad ba kin ïarap ban ym pyndonkam shuh ïa ki Pla Plastic haba leit siew sha ïew, khnang ba ngin lah ban imlang ryngkat bad ka meirymaw ha tawiar ka wah Myntdu. Da kaba ong ‘lada ym don shuh ki nongrep kba ha Myntdu Pynthorneiñ bad Myntdu Pynthorwah’, ka jingim ha tawiar ka wah Myntdu kan sa mad ïa ka jingjynjar.
Ia kyrpad ïa baroh ki briew ba sngewbha ïarap ïa ki nongrep da kaba bret ïa ki ñuit ba pyut ba kin kylla khyndew sboh bad wat ym bnret da ki Plastic ñuit, ki klong bilor sha ki sharing kiba tuid sha ki Pynthor Kba. Namar ka jingpang jingmynsaw kan ym wan tang ïa ki nongrep hynrei ïa baroh ki nongshong shnong tawiar ka wah Myntdu.
Ïa kane ka jingïalang sam Kba symbai la pynïaid da u ma Pynchngaiñ Rymbai President bad la sam ïa u kba symbai CAU R1 da u ma Pyntngenlang Kyndait General Secretary ka seng. Ka MP&FPO kala sam ha kane ka sngi haduh 70 Kgs u symbai kba sha ki arphew ngut ki nongrep ha katei ka pynthor.
