Shillong, Lber 28: Ka Nonkrek Tigers bad ka Myntdu Lions kila ïasam mar shi point ha ka lympung ïalehkai Senior Men Challengers Cup ba pynïaid da ka Meghalaya Cricket Association (MCA).
Kitei ki ar tylli ki kynhun kila hap ban ïadsam mar shi point hadien ka jingshah pynthut ha u slap ha ka jingmih madan ha ka sngi plie pyrda ïa katei ka lympung ha ka sngi Nyngkong ha madan MCA, Polo, Shillong.
Ïa katei ka tournament la wan ban plie pyrda da u Bah Dipul D Ryntathiang Vice-President ka Meghalaya Cricket Association ha ka jingdonlang u Honorary Treasurer jong ka Association u Dhrubajyoti Thakuria, u President jong ka East Khasi Hills District Cricket Association u Bah Dister Marbaniang bad President jong ka All Jaintia Cricket Association u Bah Eddystone Shylla.
U kapten jong ka Lions u Dippu Ch Sangma u la kam ban kawang bol nyngkong bad kane ka rai jong u kala ïarap ïa ka kynhun ha kaba ka Tigers kala shah pynkhyllem lut baroh ki wicket bad kamai 150 ha ki 31.2 over.
U Aryan Bora u rangkawang bol spin u la khur marwei 5 wicket bad ai kamai 36 ron ha kaba ka Nokrek hapoh ka jingïalam u Sylvester Mylliempdah (20), ka kamai 79 ron bad duh noh 7 wicket. Hynrei, u Anish Charak ha ryngkat ka jingïarap lang u Ram Gurung (15 not out) bad kamai ron lang da 67 na bynta phra wicket.
U Charak u la lah ban tied bha khamtam na ka jingkawang bol spin ha kaba u la khyrwit 52 ron na ki 42 bol ba kynthup ïa san tylli ki four bad lai tylli ki six. U Dippu u ïoh 2 wicket ai kamai 33 ron bad u la la pynhap ïa ka wicket kaba khatduh ha ka 29 over. Kiwei pat kiba la khur wicket ki kynthup ïa u Riboklang Hynniewta (1/13), Chengkam Sangma (1/15) bad u Pankaj Mandal (1/25).
Ha ka inning kaba ar ka Myntdu Lions ka khlem lah ban kamai ron bha ha kaba kala shah pynhap noh 3 wicket bad kamai tang 13 ron ha ki hynriew over. U Charak u ïoh 2 wicket ai kamai 3 ron bad ïa kitei ki 2 wicket u la ïoh ha ka shi over, katba u Ram took u ïoh 1 wicket ai kamai 10 ron.
Hynrei hapdeng ka jingïalehkai, ka suiñ bneng ka khlem ailad shuh ha kaba la hap ban pynkut noh mar shiteng ïa ka jingïalehkai bad kitei ki ar kynhun kila hap ban ïasam mar sh point.
Ka jingïalehkai mynta ka sngi Ba-ar kan long hapdeng ka Umiam Eagles pyrshah ïa ka Simsang Sharks ha ka por 9 baje mynstep.
