Shillong, Lber 28: Ka East Khasi Hills bad ka North Garo Hills kila khur jingjop ha ka lympung U-23 Women’s Inter District Cricket Tournament ha ki jingïalehkai ha ka sngi Nyngkong.
Haba phai ha ka jingïalehkai ha Nongstoin, ka EKH kala pynliem da 118 ron pyrshah ïa ka Ri-Bhoi bad kane kala wan lyngba ka jinglah ban kamai ron ka Susana Denshiew kaba kamai marwei 60 ron bad lyngba ki 4 wicket ai kamai 5 ron jong ka Lanosha Diengdoh. Katba ha Rongalbibra, ka NGH kala pynliem da 158 ron pyrshah ïa ka East Garo Hills. Ka Julitha Sangma kala khur bun wicket tam na bynta ka North Garo Hills da 5 wicket ai kamai 15 ron.
Hadien ba kala kam ban tied nyngkong, ka EKH ka kamai 173 bad duh noh hynñiew wicket, ha kaba ka Doilna Martin ka khur 3 wicket ai kamai 34 ron na bynta ka Ri-Bhoi, kaba la kamai 55 ron ha ka Group A jong ka Zone 1.
Ha kawei pat ka jingïalehkai ha ka Zone 2, ka Monitha Marak ka kamai 38 ron bad ka Chigame Marak ka kamai 24 ron bad ka NGH ka kamai da 199 ron duh noh 9 wicket ha baroh ki 35 over. Ka Silkamchi Marak ka khur 4 wicket ai kamai 42 ron na bynta ka EGH, kaba la shah pynhap lut ki wicket bad kamai tang 41 ron. Nalor ka Julitha kaba khur san wicket, ka Chigame ruh ka khur 3 wicket ai kamai 14 ron.
Mynta ka sngi Ba-ar ka jinïakhun ha ka Zone 2, ka Tura District Cricket Association kan aireng pyrshah ïa ka South Garo Hills. Katba ha ka Zone 1 yn ym don jingïalehkai, bad ba yn sakhi ruh ïa ka jingïalehkai semi-final kaba nyngkong ha ka sngi Balang hapdeng ka EKH bad Shillong CA.
