Ha ka Sngi U Blei yn ïakynduh u Conrad bad Himanta halor ka wat baar ka jingpynbeit pud

Shillong, Nailar, 20: U Myntri Rangbah ka jylla u Conrad K Sangma ha ka sngi u Blei un sa ïa kynduh ïa u Myntri Rangbah ka Assam ha Guwahati ban ïakren halor ka jingpynbeit pud sa ka wat kaba ar hapdeng ki ar jylla ïathuh u Symbud Myntri Rangbah ka jylla u Bah Prestone Tynsong.
U Bah Prestone u la ong ba kane ka jingïa kynduh jong ki ar Myntri Rangbah ka long ban ïakren halor ka jingthaw ïa ki Regional Committee ka ban peit bniah ïa ki jaka kumba la leh ha ka wat kaba nyngkong.
“Ynda ki la dep shong jingïalang na ka liang ki Myntri Rangbah kin sa pynmih ïa ka jingpynbna ba na ka liang ka sorkar jylla kan sa thaw ïa ka Regional Committee” ong u Bah Prestone
U bah Prestone u la ong ruh ba dei tang kane ka sorkar kaba mynta kaba la lah ban ïaid shakhmat ban pynbeit ïa u pud u sam bad lada shu ïai ap beit kan sa poi ka por ba ka jingkyntur pud ka assam kan sa poi wat shaduh sha Byrnihat.
“Dei ba ngi sngewkhia ïoh ngin nangduh ka jaka ba na ka liang ka sorkar hapoh ka jingïalam ka NPP ka la shimkhia bha ïa kane ka mat” u la ong.
U la ong ruh ba ha ka jingpynbeit pud ha ka wat kaba nyngkong yn ym lah ban pynhun ïa baroh hynrei ka sorkar ka la leh ïa kaba bha tam na bynta ka bit ka biang jong ka jylla.
“Kum ha Maikhuli ngi duh tang ïa i pung dohkha iba ka jingheh tang kumba 30,000 SQ Feet ka jingkynnoh ba ngi leit die sha ka Assam kaba shyrkhei, hynrei lada ym long shuh ban ïa adjust tang shi inshi da leilei ym lah ban pynbeit ïa u pud u sam” ong u Bah Prestone.
Shuh shuh na ka liang jong u, u la takraiñ tyngeh ïa ki seng saiñ pyrthei kiba don ha ka sorkar ba ki kynnoh laiphew jait ha ki kot khubor ïa ka jingpynbeit pud ha ka wat kaba nyngkong katba ha ka jingshisha dei da ka jingïa mynjur lang jong ki bad ka jingdonlang jong ki ha shuwa ban soi ïa ka MoU ba la lah ban pynïaid ïa ka kam shakhmat. Nalor kata ki don lang ruh wat ha ki Regional Committee ruh kum ki dkhot, ong u Bah Prestone.