Shillong, Nailar, 20: Ka seng saiñpyrthei Peoples Democratic Party kaba ïatreilang hapoh ka kynhun jong ka Meghalaya Democratic Alliance (MDA) kaba bat ïa u lakam synshar hapoh ka Jylla ka la rai ban ïaid beit la ka jong ka lynti bad ban ym ïatreilang satia bad kano kano ka seng saiñpyrthei ha ka elekshon sha ka Iingdorbar Thawaiñ ka jylla ka ban sa long ha u snem 2023.
U Working President jong ka PDF u Bah Banteidor Lyngdoh ha ka jingïakren bad ki lad pathai khubor hadien ba la wai ka jingïalang Triennial Conference kaba la long ha ka sngi saitjaiñ u la ong, “naduh kaba sdang hi ngi la ïakren ba ka PDF ha kane ka Elekshon ba mynta kan ïaid beit marwei bad ynda ladep ka elekshon ngin sa ïa peit ka long ka man kumno ha ka jop bad ka rem. Hangta ngin sa ïa pyrkhat bad hynrei ïa mynta hi ngi la rai ban ïaid beit marwei.”
Haba kylli, hato ka jingïatylli hapdeng ki Seng Riewlum ka la kut, u Bah Banteidor u la ong, “haduh mynta ruh ngi dang ïatylli bad ngi don ïa kajuh ka thong na ka bynta ba ngin trei bad ban pynim ïa ki seng riewlum. Baroh ki Seng Saiñpyrthei ki don hi ïa kata bad ngi don ïa kajuh ka jingïasngewthuh jingmut bad ka shu long ba ngi ïa don la ka jong ka party.”
U la ïathuh ruh ba ki nongrim kiba ka party ka la buh hakhmat eh ban ïakhun ïa ka elekshon ka long, “ban wanrah ïa ka synshar ka khadar kaba khuid, ban wanrah ïa ka Youth Policy kaba ma nga kum u Myntri ka tnat Sports and Youth Affairs nga ladep leh. Ban wanrah ïa ka jingmyntoi ïa ki nongrep, kaba ngi ladep leh. Ban wanrah ïa ki lad ïohkam ïohjam jong ki samla, kane ruh ngi la ïakren. Ban pynneh ïa ka sngap jinglong tynrai jong ngi ka party ka ieng skhem ïa kata.”
“Ha ka elekshon ka ban sa long, kaba kongsan eh ka long ban wanrah ïa ka Sorkar kaba khuid bad kaba pynhun ïa u paidbah. Kata ka dei ka nongrim” u la bynrap.
