Plie u Bah Renikton ïa ka CRC ha Mawranglang Laikyntoit ha ka jingmang pisa kaba T. 60 lak

Mawkyrwat, ‘Nailar, 20 : U bah Renikton Lyngdoh Tongkhar, Nongmihkhmat ka Mawkyrwat Constituency bad Myntri ka tnad umbam umdih jong ka Jylla Meghalaya kum u kongsan ha ka sngi palei jong ka taïew u la ïoh ban plie bad ot ribon ïa ka Community Resource Center (CRC) ha Shnong Mawranglang Laikyntoit ha ryngkat ka jingïadonlang u bah Carness Sohshang, MDC ka Mawkyrwat Constituency, u bah W. Biam, MCS, Additional Deputy Commissioner, South West Khasi Hills District, u bah I. Lawrynñiang, MSC, BDO ka Mawkyrwat C&RD Block ha ryngkat kiwei de ki riew rangbah jong ka shnong.
Lah ban kdew ba ïa kane ka Community Resource Centre la pyntrei da ka skhim 100 sngi ne MGNREGA napoh ka ophis jong u Block Development Office, Mawkyrwat C&RD Block ryngkat ka jingïasnohktilang ka DRDA, South West Khasi Hills District ha ka jingmang pisa kaba T. 60/- lak tyngka bad haduh ban pynpoi ha kane ka thong ban ïoh ba plie paidbah mynta ka sngi ka jingmang pisa kaba la ïoh ban pynlut ha kane ka jingtei ka long T. 82/- lak tyngka ei ei.
Ïa kane ka jingtei la ai kyrteng ‘Resource Centre” namar ka don ha ka ïa ka jingthmu ban pyndonkam ha baroh ki kam la ka long ha ki kam jong ka shnong, kam jong ki ophis sorkar bad kumjuh ruh lada donkam ki briew ban sah miet ruh ha kane ka jaka ki la don la ki kamra ba kyrpang.
Haba kren kum u kongsan, u bah Renikton Lyngdoh Tongkhar u la ai ka jingïaroh ïa ka jinglah jong ki nongtrei ne ki mistery ban pynwan dur itynnad ïa kane ka jingtei katkum ka dur ba la ai lypa ha kaba watla ha ka jingmang kaba rit hynrei ki la lah ban pyndep ha i por i ba lyngkot bad kumjuh ruh ïa ki ophisar sorkar ha kaba ki la don ïa jingïatrei lang da ka mynsiem bad ïa long kawei. Ha ka juh ka por u la ong ruh ba ka jingïoh ban plie ïa kane ka Community Resource Center (CRC) kan sa long kawei na ki lad ban ai ki jingïarap ïa kiba bun ki briew ki ban sa ïoh ban pyndonkam kum ki jingïalang bad kiwei kiwei de ki prokram. “Da ka jingïoh ban shna ruh ïa ki kamra ban sah miet kum ki Guest House, kan sa long ka jingïarap ïa ka shnong ban pynmih pisa da kaba kin pdiang burom ïa ki briew kiba donkam khamtam eh ki briew kiba nabar kiba wan kai pyngngad sha kine ki jaka jong ngi lada ki donkam ban sah miet”, ong u bah Renik.
U Bah Renik u la ai khublei kyrpang ruh ïa u bah Rowell Lyngdoh, MLA barim jong ka Mawkyrwat Constituency (bam kwai ha dwar U Blei) uba la pynngeit ïa ka sorkar ban wanrah ïa kane ka skhim Rurban Mission ha kane ka distrik South West Khasi Hills ha kaba ka dei kawei na ki 4 tylli ki distrik ba kynthup ïa West Jaiñtia Hills, ïa North Garo Hills, bad ïa South West Garo Hills, pynkynmaw u bah Renik ha kaba kine ki distrik ki dei kiba hap ha ka jingpyntyllun ïa ki kam pynroi lyngba ka Shyama Prasad Mukherji Rurban Mission.
U la ong ruh ba ban pyntyllun bad ba kan ïaid shaphrang ïa ki kam ka donkam nangne shakhmat ïa ka jingïatreilang, ka jingïatylli bad ka jingïasngewthuh jingmut namar la sngewthuh ba ha kane ka shnong ki don lai tylli ki kyntoit.
Lada kane ka ‘Resource Centre’ kan long kam, ym don jingartatien ba kan don ka jingdkoh ha ki rukom treikam, hynrei kaba sngewsih ba ha kiba bun ki jaka ki ïing shnong ki ong beit ba ki dei ki ïing paidbah haba bunsien la ju sakhi ba tang katto katne dap sa tang da ki jakhlia. Namarkata, u khmih lynti ba kane ka jingtei kam dei ban long kumta, hynrei kan long kaba itynnad bad iphuh iphieng ha baroh ki por. “Lada ki kwah ban kane ka jingtei kan neh bad ka jingitynnad jong ka ruh kan wan dur bha kumba ka long mynta ka donkam ba kum ka shnong ka dei ban buh beit da u ne ka nongpeit, ym ban shaniah ha kiba bun”, ong u bah Renik namar kaba shaniah ha kiba bun kan long kaba shitom.
Ha kane ka sngi na ka liang u bah W. Biam, MCS, Additional Deputy Commissioner, South West Khasi Hills District u la aiti ïa ka kot sha u Myntri Shnong jong ka Mawranglang Laikyntoit ba kin longtrai noh ïa kane ka jingtei.
Kiwei pat ki nongkren ki long u bah W. Biam, MCS, Additional Deputy Commissioner, South West Khasi Hills District, u bah Carness Sohshang, MDC ka Mawkyrwat Constituency.
Ïa kane ka prokram la pynshit pynshngaiñ da ka jingrwai pdiang na ka Merishisha Syiemlieh bad ki paralok, ka jingshad na ki khynnah skul jong ka RC LP School, Mawpharkhrew bad ka jingrwai Tynrai na u samla John Gilbert bad ka Kynhun.
Ïa ka jingïalang la pynïaid da u Myntri Shnong ka Mawranglang Laikyntoit, bah R.S. Marweiñ, ka jingkren pdiang na u Secretary Shnong Mawranglang Laikyntoit, bah B.P. Nongsiej bad ka jingkren khublei na u Assistant Secretary Mawranglang Laikyntoit, bah Juneshaibor Lyngdoh.