Kynnoh u Bah Bindo Lanong ba ïaid pyrshah ka UDP ïa ka riti treikam haba jied Kyrtong

Shillong, Nailar, 18: U Nongaibuit barangbahduh jong ka United Democratic Party (UDP) u Bah Bindo Mathew Lanong u la phah da ka jingthoh sha u President jong ka Party u Bah Metbah Lyngdoh ha kaba ïadei bad ka jingjied ïa ki kyrtong jong ka UDP na ka bynta ka elekshon sha ka Iingdorbar Thawaiñ ka Jylla ka ban sa long ha u snem 2023.
Ha kane ka shithi, u Bah Bindo Lanong uba la long ruh uwei na ki dkhot ba la rim tam hapoh ka UDP, u la ong, “ki don ki jngud na kylleng halor ka jingjied ïa ki kyrtong ka seng UDP jong ngi. Haba nga ïoh jingtip bad jingud na kylleng, ba ïa ki rangbah bad ki nongïalam ka Seng ha kiba bun ki District, phim peit bha bad phim ai ka burom ba dei hok ïa ki.”
“Kane ka jingleh jong phi ki nongïalam, kan ktah shibun ïa ka Seng namarba la pyntip sha nga da ki rangbah ka Seng hi, na ka thaiñ Jaintia Hills, Ribhoi bad na shawei ruh, ba phi pynnoh tarajur pynban sha ki bym dei na ka Seng, namar ki dei ki nongkhaïi heh spah. Tip ka spah jong ki haduh katno kan lah ban pynjop ïa ki ne ba kin don mynsiem ban pynkhlaiñ ïa ka party,” la ong u Bah Bindo.
“Kumta nga la pynpaw ruh naduh basdang, ba ka jingpynïaid jong phi da ka Core Commitee ha kaba jied kyrtong, ka ïaid pyrshah ïa ki rukom treikam jong ka Seng bad ïa ka riti treikam, ïa kaba phin sngewbha ban da peit bniah ïa kane ka bynta,” la bynrap u Bah Bindo.
“Ki District ki dei ban phah ïa ki jingai jingmut katkum ka riti treikam bad ki rukom ba ju leh, lada don ka jingbym hun ïa kaba leh ki district, ka State Election Committee (SEC) ka shimti ban pynbeit,” la ong shuh shuh une u nongaibuit ba rangbahduh ka UDP.