Shillong, Nailar, 18: U Nongïalam ka Liang Pyrshah jong ka Iingorbar Thawaiñ ka jylla u Dr. Mukul Sangma ha ka sngi Palei u la phah da ka jingthoh sha u Myntri Rangbahduh ka Ri India u Narendra Modi halor ka jingkynnoh ba ka don ka jingpyndonkam bakla bad ka jyrsieh bamsap kaba shyrkhei ha kaba pyndait ïa ki Smart Meters da ka Ophis jong ka Meghalaya Energy Corporation Limited (MeECL) hapoh ka jylla.
Ha ka jingïakren bad ki lad pathai khubor u Dr. Mukul Sangma u la ong, “ha ka shithi ba nga la phah sha u Myntri Rangbahduh nga la kdew ïa ka jingpyntreikam ïa ki Smart Meters ba dei ban thung da ka jingtohkit kaba laitluid lyngba ka Special Invetigation Team (SIT) lane ka Central Bureau of Investigation (CBI).”
Ka tnat sam Bording ka la aiti sha ka Satnam Global Infraprojects Ltd bad ka JPM Industriest and Inhemeter Company Ltd. ban pyndait ïa ki Smart Meters ha ki thliew iing ha kane ka jylla.
“Namarba u Myntri Rangbahduh u la kular ïa ngi ba un ïakhun pyrshah ïa ka bamsap, nga la shim ïa ka rai ban thoh da ka shithi sha u ban thung da ka jingtohkit halor ka jingkynnoh bamsap ha ka tnat sam bording jong ka jylla Meghalaya hapoh ka jingsynshar jong ka Sorkar Meghalaya Democratic Alliance,” ong u Mukul.
“Ka dei ban don ka jingpyrshah kaba jur ha ka jylla halor ki jingïai bteng ki jingdkoh kaba ktah ïa ka ïoh ka kot jong ka jylla. Hapoh ka jingsynshar jong ka Sorkar MDA, ïa ki jingmyntoi u paidbah la shu pynsyrwa ei khlem ka jingkheiñ jingdiah kaba biang. Namarkata, ngi dei ban pyrshah lang da baroh,” la kyntu u Dr. Mukul ïa ki paidbah nongshong shnong ka jylla.
“Ym dei tang ka Liang Pyrshah, hynrei wat ki Seng Saiñpyrthei kiba ïatreilang hapoh ka Sorkar MDA kiba kynthup ïa ka UDP bad ïa ka BJP ruh ki la pyrshang ban dawa ïa ka Sorkar ba ka thung da ka jingtohkit ban lap ïa ki jingïapher jong ka dor haba pyntreikam ïa ki Smart Meters bad ka dor iew. Wat haba ka Sorkar ka la thung da ka jingtohkit bad ïa ka kaiphod ruh ladep aiti sha ka Sorkar, hynrei ka Sorkar kam shym la pynbna paidbah ïa ka kaiphod tohkit,” la kynthoh u Dr. Sangma uba long ruh u nongïalam jong ka Trinamool Congress.
Katkum ka jingthoh ba la phah sha u Narendra Modi, u Dr. Mukul ula kdew ba ka ka jingïapher jong ka dor ki Smart Meter ka long 137.555 klur haba ïanujor ïa ka dor ba la siew da ka Sorkar Meghalaya bad ka dor iew.
“Hynrei ki kyndon kiba kdew shai ban lap ïa ki jingkynnoh ba la pyndonkam bakla ha ka Saubhagya Scheme bad kumjuh ruh ha ka jingïapher jong ka dor ki Smart Meters kim shym la don satia na ka jingpynbna jong ka Enquiry Commission. Namarkata, nga ñiew ba kane ka jingphah tohkit ka long tang ban shu pynthame. Ka dei kaba la suhbuit tang ban shu pynbiej ïa u paidbah,” la kynnoh u Dr. Mukul.
Ha kaba ïadei bad ki Smart Meters, u Dr. Mukul ula ong, “ka Sorkar MDA ha ka jaka ban leh eiei ka la kam pynban ba ka la shah kynnoh. Kaba kham pynkyndit shuh shuh ka long ba ka Sorkar ka kam ba ki dei tang ki jingkynnoh haba don kino kino ki jingdkoh treikam kiba paw pyrthei khamtam ha kaba ïadei bad ka jingpyntreikam ïa ka pisa u paidbah.”
U la ïathuh ruh ba ha ka shithi ba la phah sha u Modi, u Dr. Mukul u la ong ba u la kdew lut ïa baroh ki jinglap kiba ka AITC ka la shem. “Kaba nyngkong, ka dei kaba la kdew katkum kaba la paw ha ka khubor ba la thep ha Social Media da u James PK Sangma mynba u dang long u Myntri barim ka tnat Sam Bording, kaba u la pynpaw ba u sngew kmen haduh katta katta ba la pyntreikam ïa ki Smart Meters.
“Ka don ka jingïapher kaba jur ha ka dor ka mur ha ka dor iew ba la die ïa ki Smart Meters bad ïa ka dor ba la ai. Ka dor iew ka dei kaba la shim katkum kaba paw ha ka Website jong ka kompeni kaba la shna ïa ki Smart Meters,” ong u Dr. Mukul bad bynrap, “ka Sorkar MDA ka dei ban da kdew shai ïa ka dor jong kine ki Smart Meters.”
