Nongstoiñ, Nailar, 18: Ka jingpyntreikam jong ka sorkar pdeng ïa ka MGNREGS ha baroh ki jylla jong ka ri, ki la long ka jingkyrkhu kaba khraw eh haduh katta katta na ka bynta ki nongshong shnong bad ki da paw bha ruh, ym kum ki skhim jong ki sorkar jylla kiba la shu jah rngai khlem paw pyrthei khamtam ha West Khasi Hills District.
Ha ka jingjurip jong u nongthoh khubor ïa ki shnong ha kylleng ki jaka naduh ki shnong ha ki jaka sor haduh ki shnong kiba ha ki jaka ba kyndong duh, la lap ba ka jingpyntrei kam hok jong ki dorbar shnong ïa ka skhim shi spah sngi ka la long shisha ka jingkyrkhu kaba khraw ïa ki paidbah.
La lap ruh ba lyngba ka jingpyntrei jong ka sorkar pdeng ïa katei ka skhim na ka bynta ban shna ïa ki surok shnong, ki madan ïalehkai, ki pung dohkha, ki jaka pynlang jaboh, ki sem sniang, ki sem syiar bad kiwei kiwei ka la pynlong ïa ki shnong ki thaw ba kin kiew ha ka ïoh ka kot bad ka kamai kajih.
Kaba kham itynnad ka long ba na ka bynta ka jingpynïaid ryntih ha ka ban pyntrei ïa katei ka skhim, ka sorkar pdeng ka la mang pisa kyrpang ruh na ka bynta ban shna ïa ki ophis treikam na ka bynta ba ki dkhot bad ki nongkitkam jong ki Komiti kaba kyrpang ba la tip kum ki Area Employment Council. Lyngba kitei ki Komiti ki dkhot bad ki nongkit kam ki hap ban shong pyrkhat kiei ki jait jingtrei ba ki paidbah ki donkam.
Haba pyrshang ban wad jingmut na ki katto katne ki nongkitkam jong ki shnong kiba la shna ïa kiba kum kitei ki ophis treikam, ki la ïathuh ba kitei ki AEC ki dei ki Komiti ba kynthup ïa ki katto katne shnong kiba marjan kiba ka jingpyntrei ïa katei ka skhim kum ki surok shnong, ki lynti ïaid kjat bad kiwei kiwei ka dang ïa tyngkhuh bad pynïasohlang.
La ïathuh ba napdeng ki shnong ba mar jan kiba dang lah ban pynïasoh ïa ki jingtrei, la shna ïa kiba kum kitei ki ophis treikam ha ka shnong kaba kham long pdeng, khnang ba ka jingtreikam kan long kaba beit bad bad ïa ki dkhot bad nongkitkam jong ka Komiti, la ju jied lang na kito ki shnong kiba ïa snoh lang ha kaba pyntrei ïa katei ka skhim.
Kawei pat ka jingmyntoi jong ki paidbah na ka jingdon jong kitei ki ophis treikam jong ka MGNREGS, ka long ba lada dei ki shnong ki bym pat ïoh jingïarap na ki nongmihkhmat ban shna ïing dorbar ïa ki Komiti shnong bapher bapher bad ïa ki jingïalang kiba rit ki ju pynlong ha kitei ki ophis treikam jong ka skhim shispah sngi.
Kumta ka la long ka jingmyntoi kaba khraw na ka bynta jong ki paidbah. La lap ruh ba ki don ki surok shnong kiba la ïoh ban siang rong lyngba katei ka skhim shispah sngi kaba la long shisha ka jingkyrkhu kaba khraw ïa ki nongshong shnong.
