Shillong, Lber 27: Ka Jylla Meghalaya kala nang hiar nang hiar mynta ha ka jingdon jong ki briew kiba don ïa ka jing pang Covid-19 ne ki active case da ka jingnang bun kiba koit na ka sngi sha ka sngi.
Ki active case kiba don mynta ki sah tang 44 ngut bad haduh 14 ngut ki dei na East Khasi Hills. Ka West Khasi Hills bad North Garo Hills kila lait na kane ka jingpang bad ym don shuh ki briew ba dang kit ïa u khniang.
Kat kum ka jingpyntip ka Tnad ka Koit ka Khiah, ki briew ba dang ïabit thymmai ïa ka jingpang kila don satang iwei mynta ka sngi katba 6 ngut ki nongpang kila ïoh pat ïa ka jingkoit. Ka jingdon jong kiba ïap ka long 1593 ngut baroh lang.
Haduh 93758 ngut ki briew kila ïabit ïa kane ka jingpang ha kine ki laisnem tam mynta hynrei haduh 92121 kila ïoh pat ïa ka jingkoit.
