Shillong, Lber 27 : Ki ophisar kiba don ha ki District bapher bapher khamtam ha ki district ba kynrei bha u dewiong ki la syier shisha thot thot ïa ka hukum jongka ïing Bishar High Court ka jylla namar naduh ba lap hi da ki Nongbishar ba ka don ka jingtih bad khaïi dewiong beaiñ haka jylla ha ka jingleit jurip sha East Jaintia Hills mynta la sdang ka jigkurup dewiong kylleng ki district.
Baroh kine ki bnai bad ki snem ba la leit noh wat haba ki seng, ki riew pawkhmat, ki MLA ki MDC ki kren bad dawa ba ka sorkar kan thung da ka jingtohkit kumba la dawa da u Nongialam ka Liang Pyrshah u Dr Mukul Sangma hapoh ka ïing Dorbar Thawaiñ ka jylla ka sorkar kam patiaw ba ka don beit ka jingsait khuid ba kam don kata ka jingkhaïi dewiong wat haba ki paidbah ki ïohi pylleiñ pylleiñ da la ki jong ki khmat ïa ki trok ba kit dewiong ruh.
Hynrei mar ïa tied tyrnem ki nongbishar ka ïing Bishar High Court ba btah ïa ka sorkar ba ka dei ban peit pyrkhing ba kam dei ban don ka jingkhaïi dewiong beaiñ, mynta la sdang paw pyrthei ba pleng kata ka khaïi dewiong beaiñ kaba rieh tngen baroh shi katta ha kita ki bor synshar mynta ka la sdang ban paw pyrthei.
Naduh ka taiew ba la dep ki ophisar jong ka East Jaintia Hills District ki la ïoh kurup bun bah u dewiong ba la tih beaiñ bad lum thup ha ki rud surok Rymbai, Sutnga bad ter ter. Mynta kane ka jingkurup ka la sdang ban pur sa sha West Khasi Hills.
Ki ophisar jongka Mawsynrut, West Khasi Hills ha ka jigleit jurip kynsan shaki jaka tih dewiong ha Nirang bad Miangmawdar ki la lap ba ka don ka jingtih dewiong beaiñ bad ki la ïoh ban kurup ïa u dewiong uba 2012.47 MT.
U EAC jonkga Mawsynrut u bah Lamriche Kharmon ula ai ka jingujor ba ha ka 24 tarik ma u, ki ophisar bad ki bor pulit ki la leit jurip kynsan sha kitei ki jaka ba la kdew haneng bad ïoh ban kurup ïa utei u dewiong.
