Nongstoin, Lber, 27: Ka seng trei mon sngewbha kaba la tip kum ka Green Defenders na West Khasi Hills District, kawei na ki seng kaba don ïa ka jingangnud ban pynneh pynsah ïa ka mei mariang kaba la lam khmat da u bah Flydenstar Marngar kum u President bad u Jimfelson Kharpor, ha ka sngi saitjain jong ka taiew ba la lah, ka la mih madan ban pynkhuid ïa ka Wah Nonbah kaba don ha sor Nongstoiñ, West Khasi Hills District.
Ïa katei ka jingpynkhuid wah jong katei ka seng la ai jingkyrshan lang ruh da ka kynhun jong ki Village Organisation jong ka shnong Upper New Nongstoiñ, ka Village Organisation jong ka New Nongstoiñ, ka seng KSU, ka seng HYC, ka seng HANM, ka seng FKJGP, ka seng Ha la Tynrai Eco Tourism Co Operative Society, ka ophis jong u Syiem ka Hima Nongstoiñ, ka ophis jong u Deputy Commissioner ka West Khasi Hills District bad kiwei.
Ïa katei ka jingpynkhuid ïa katei ka Wah la sdang naduh ka por kaba 7 baje mynstep haduh ka por janmied bad la ioh ruh ban sei ïa shibun ki ñuit ki ñier na katei ka wah, khamtam eh ïa ki plastic kiba dei kiwei na ki tiar kiba pynjot bha ïa ka mei mariang.
Ka seng ka la pynpaw ruh ïa ka jingsngewnguh ia baroh kiba la ïa snohkti lang ban pynkhuid ïa katei ka wah.
