Ki kam sniew naduh ka kam ban pynïap briew, leh be-ijot, ka tuh ka thiem bad ki kam pynkulmar shong pynkulmar thaw, ki dei kiba ju jia beit wat na ka liang ki bor pulit ki la trei smat ne trei shitom, pynban u ba bun hi u riewsniew u dang ïoh ban ïaid laitlan, ban shang kylleng ki kyndong ki kynshrot ban leh ïa ki kam pyntriem bad ba pynpar ñiangkhriat ïa u ba bun balang.
Ha ka juk ba la synshar da ka jingkwah rhah ka dei beit tang ban ïoh ïa kino kino ki jingsngewbha pyrthei, hynrei ha kaba kut haba la brai bad ym lah shuh ban kiar, ban pynhun ïa ka mynsiem, la sdang sa da ki kam ban shu tuh bad haba la kyrni, ka jingïatip lem ka duh ka dam noh syndon tad haduh ba ym don shuh ka jingsheptieng shuh ïa u briew U Blei ban shim ne ban pynduh syndon wat ïa ka mynsiem briew ruh.
Hynrei donkam shisha ban ïaroh ïa ki pulit, kiba ïai trei sh itom bad ki bym ju shim por ban kem lane ai jngsneng ïa kino kino ki runar ne ki kynhun jong ki nongkam bymman kiba leh ïa ki kam ba harukom kiba pynthut ym tang ïa ka imlang sahlang hynrei ban pynrit mynsiem bad pynduh thiah pynduh dem ïa ki bahaïing ha sem ruh.
Ha kane ka juk kaba baroh ki beh spah, ka eh ruh haduh katta katta ïa ki kmie ki kpa ban buddien ïa ka leit ka wan ne ki kam ki kam ki jam jong ki khun khamtam eh haba ki la khie samla. Dei ruh ha kum kane ka por ba lada ym lah ban bishar bad peit ïa ki khun, khamtam ki khun shynrang ba ka poi sha ka jingjia ba sngewsih namar ka ju jia ruh bun ki khep ba tang namar ka jingkynduh paralok, ki samla shynrang ki ngop noh ha ki jingmyllien ba sniew khamtam ha ki jingdih pynbuaid naduh u drok, kyiad bad kiwei ki jingdih.
Dei lyngba ka jingkyrni ïa kum kitei ki jingmlien ba lada kim ïoh shuh ïa kaei kaba ki kwah kim banse wat ban tuh ne leit lute na ki ïing khlem salia shuh la ki hap ban leh ïa kano kano ka kam ruh bad lada don ba pynwit ruh kim salia satia wat ban shim ïa ka jingim briew ruh.
Hynrei ban poi sha u pud tad haduh ban shim ïa ka mynsiem briew, ka imlang ka sahlang kam sngew lah shuh ba kan peiphang, ha kaba mih ka jingkylli aiu kein ka la jia ïa ki ha ki khyllipmat ba ki pynïap ïa ki briew, hato ym don shuh wat tang khyndiat ka mynsiem ïa tip lem ne ban tieng lem ïa u Blei, hynrei em, namar ba ha ka dohnud ba la kylla riewsniew, kaei kaba la rung ka dei beit tang ka jingthame ka spah bym hok bad kwah pynhun ïa la ka jingbrai ka doh.
Ka aiñ briew ka dei hi ka aiñ briew, kaba la thaw ban khanglad lut ïa ki kam sniew, hynrei ka jingsynjor i ba khyndiat ka pynlong ïa u riewsniew ba un shim ïa ka kabu wat haduh ba un da lait wat ban shah set ha ki ruh nar jong ka aiñ briew. Pynban ki riew sniew ki klet bha. Kane ka kawei, kata hi ka long ba ka aiñ Blei najrong ka peit ka khmih bha aiu u bynriew u leh ban kam ha kane ka sla pyrthei, kumba u la buh bad sam ka bynta, u khmih shin bha shi kam ba u bynriew u kam, aiu u thmu bad aiu u mut ban leh, ha kaba lada dei kaba bha, shipor un tynjuh, hynrei lada dei hi ïa kaba sniew, ka nongkylliang kam slem, kaba ha kano ma kano ka sngi haba ym don ba poi pyrkhat, jraiñ kumba tied u pyrthat bad ba thaba ka leilieh, u Blei u pyndep la ka jong ka jingbishar.
Hynrei wat la katta ruh ban tei pat ïa ka imlang ka sahlang, ki long ïing long sem ba la pait la pra ka donkam ka jingïatrei lang naduh ki bor pulit, ki dorbar shnong, ki long ïing long sem, ki seng samla, ki seng long kmie namar kine ki dei ki paia ban tei ïa ka lawei jong uwei pa kawei ki nongshong shnong da kaba ïaid pat da ka lynti kaba dei bad biang eh ym ban shim pat ïa ka aiñ ha kti.
