Thoh ka JACBoM sha u SP ka West Karbi Anglong ban pynshitom ïa ki Pulit ka Jri Kyndeng

Shillong, Nailar, 14: Ka Joint Action Committee on Border of Meghalaya (JACBoM) ha ka sngi saitjaiñ ka la thoh sha u Superintendent of Police ka West Karbi Anglong District, Hamren Assam, lyngba u Dy.SP u Barman ban ujor pyrshah ïa ki Pulit ka Jri Kyndeng Police Station kiba la kawut lathi bad tyndung da ki tdong suloi ïa uwei u khynnah skul bad arngut kiwei pat.
Ha kane ka ujor ba la soi da u Chairman ka JACBoM u Bah Erwin K. Syiem Sutnga bad u Secretary u Bah Rastingwell Thabah, ka JACBoM ka la pyntip halor ka jingleh bym dei jong ki Pulit ka Jri kyndeng Police Station kiba la shoh pynmynsaw ïa uwei u khynnah uba kyrteng u Wanlangki Sungoh , ïa u Bah Manki Sungoh bad u Bah Augustine Shylla.
Katkum ka ujor ka JACBoM ka la ong, ha ka 11 tarik, Nailar, 2022 ki nongshong shnong jong ka shnong Mowjem ki la leit wad ïa uwei u briew uba jah na Moojem katba u dang leit khwai doh.
Hynrei, ha ka por kumba 11:00 baje mynmiet, katba kine ki nongshong shnong ki dang wan phai sha la iing, kynsan kynan ki Pulit ka Jri Kyndeng Police Station hapoh ka jingïalam jong u Second OC u Saikia ki la bat ïa kine ki briew bad rah ïa ki sha thanat Jri Kyndeng bad kawut lathi ïa kine ki lai ngut. Namarba kine ki lai ngut kim shym la poi iing wat haduh ka por mynmiet, ki nongshong shnong jong ka Mowjem bad kiwei kiwei ki shnong ki la leit wad ïa ki bad lap pynban ba ki don ha Police Station, la ong ka JACBoM.
Katba ki dang don ha Police Station u Officer In-Charge ha ka jaka ban tohkit, u la shu hukum beit beit ïa ki Pulit ban kawut lashi ïa kine ki nongshong shnong bad ïa u khynnah rit uba don lang ha kane ka por uba la jngem snam lut ka met namarba u la shah tied da ka tdong suloi. Ïa kane, ki Pulit ki la leh hakhmat u Waheh Shnong jong ka Sapiang, ka Mowlaiñ, ka Mowjem, bad u Secretary lem bad ki Executive Member jong kine ki Dorbar Shnong.
Shh shuh, une u khynnah u dei tang u khynnah skul uba dang 16 snem ka rta bad u dei uba dang pule ïa ka Class-IX ha kawei ka skul ha ka shnong Jri Kyndeng. Une u khynnah u la synran ïa kiba leit wad ïa u briew uba jah namarba une uba jah u dei uba dang dei u bahaing hasem uba dang ïajan.
“Namarkata, ngi kyntu ïa phi ban pynshitom pyrshah ïa ki Pulit kiba donkti ha kane ka jingjia khnang ba ki Heh Pulit ka Jylla Assam kin dup pynshitom ïa ki katkum ki kyndon jong ka aiñ namar ka jingpyndonkam bakla ïa la ka jong ka iktiar da kaba thombor ïa ki nongshong shnong ba luilui kiba donkam ïa ka jingïarap jong ki Pulit Assam ban wad ïa u briew uba la jah,” ong ka ujor na ka JACBoM ba la phah kopi ruh sha u DGP ka Jylla Assam u Bhaskar Mohanta.