Jowai, Nailar 14: Ki paidbah Nongshong shnong ka thaiñ Mowkaiaw Constituency khamtam ki shnong kiba hap ïaid lynti na u surok Sahsniang shaduh Raliang kila pynpaw ïaka jingkmen ba mynta ki la khamsuk ka leit ka wan hadien ba na ka liang u ma Nehimaya Tyngkan ha ryngkat ki nongkyrshan jong u kila ïarap ban maramot pynbha ïa u surok ba ki paidbah ki leit ki wan.
Ki katto katne ki longkmie bad ki rangbah na ka thaiñ Mowkaiaw ki la pynpaw ïaka juh ka sur jingkmen haba mynta khyndiat ki la khamsuk ka leit ka wan watla kila ka jingmaramot kam pat dei da kaba ai rong ïong kaba paka ruh, khamtam ha ki bynta ba la sniew shaba palat.
Ki paidbah ba ïaid ba ïeng lyngba une u surok ki sngewnguh shi katdei eh ïa u ma Nehimaya Tyngkan namar mynta la 5 snem ki hap ïaid ha u surok uba khohrum khohram watla ïa une u surok la pyndonkam da ki bun tylli ki shnong ha ka leit ka wan, la pynsngew uwei u rangbah ha ka kyrwoh.
Sa kawei ka kong J. Lyngdoh na Mooshrot kala ong ba ki kynthei ki khynnah kila kham sngewsngaiñ ka leit ka wan haba u surok u bha, teng teng ki sngew kumba ympoi jaka shuh haba ïaid lyngba na u surok ba sniew.
Kiba bun ki pynsngew ba kane ka jingshmim khiam jong u ma Nehemaya Tyngka kala long shi bynta kum la lad jingïarap ha ka leit ka wan jong ki paidbah nongshnong shnong bad la kyrmen skhem ba ka sorkar kan shim ka jingkitkhleih na ka bynta u paidbah, da kaba pynbha noh ïa kane ka surok ha ka rukom kaba dei namar u surok udei u budlum jong ka roi ka par.
