Jowai, Nailar 10 : Ki nongshet ja sngi ‘PM Poshan (MDM)’ ïa ki khynnah skul hapoh ka lama jong ka All Jaiñtia Mid Day Meal Worker Union, Jowai mynta ka sngi kila phah biang ïa ka shithi sha u Myntri Rangbah ka jylla u Conrad K Sangma bad dawa lyngba ka share jong ka sorkar jylla ban pynkiew ïa ka bai nong jong ki kaba ki ïoh duna eh na ka sorkar jylla.
Kumba long mynta ka sorkar ka kmie ka la siew pisa haduh 90 percent katba ka sorkar jylla ka long tang 10 percent 100 tyngka lada kheiñ lang ka long tang 1000 tyngka ha ka shibnai, halor kane ka AJMDMWU ka dawa jur na ka sorkar jylla lyngba u Myntri Rangbah ba kan ïarap katba lah ban pynkiew noh ïa kane ka share.
Na ka liang jong kitei ki nongsheh ja sngi ‘PM Poshan’ kila pynpaw ïa ki jingeh kaba khraw ban pyndap pynbiang ïa ki khun ki kti, naduh ka bai skul, bai uniphom, ka bai kot bai kopi bad kiwei de ki jingdonkam jong ki khun jong ki.
Hynrei lada kheiñ ïa ka bai nong kum ka jingsiew ba ai sngewbha ‘Honorarium’ ka long tang T.1000/- shi bnai kaba shongdor tang 30 shi sngi bad ka jingsiew ka long tang 10 bnai haka shisnem ïa kane ruh kila dawa ban dei ban siew beit haduh 12 bnai ha ka shisnem namar ha u bnai December ka don shibun ki jingdawa ban ban pynkhreh ïa ka Christmas.
Katkum katei ka shithi ba la soi da u Jerry Suting uba long ruh u President ka All Jaiñtia Mid Day Meal Workers’ Union (AJMDMWU) bad ka General Secretary kong Joycifull Lipon la dawa naka sorkar ba ka dei ban buh noh da ki tyndong shet jingshet LPG ha ki kamra shet hapoh ka PM Poshan khnang ba kane kan lait na ka jingpyndonkam da ki dieng (dpei) kaba ktah ruh ïa ka mariang.
Ha ka juh ka por kila kyntu ïa ka sorkar ba kan pyntreikam noh mardor ïa kane ka jingdawa jong ki hashwa jong ka 30 tarik u Nailar, 2022 lada kumta kim banse ban shim da ki lad ki lynti ba kham tyngeh.
