Jowai, Nailar : Katkum ka kyndon Flag Code jong ka ri India 2002 bad ka Prevention of Insults of National Honour Act, 1971 haba ki nongshong shnong ka jong ka Ri kin pynher ïa ka Lama Lai rong jong ka Ri ki dei ban leh da kaba niewkor bad burom ïa ka.
Haba pynher ïa ka Lama dei ban pynïeng ha ki jaka ba lah ban ïohi briew. Ym dei ban pynher ïa ka Lama kaba la jot ne pei. Ym dei ruh ban pynher ïa ka Lama da lyndet kata ka rong Sawbyrtem (Saffron) shatrai, hynrei ka dei ban don shalor.
Ka Lama ka Ri kam dei ban takhuh bad ka khyndew lane sha madan lane ha um. Ïa ka Lama ka Ri ym lah ban pyndonkam bakla da mano mano ha kano kano ka bynta. Ïa ka Lama ka Ri ym lah ban pyndonkam kum ki jingphong ne ki uniphom skul ne kino kino ki jaiñ kiba phong shatrai jong u syngkai briew.
Ka Lama jong ka Ri kam dei ban don jingthoh dak halor jong ka. Ïa ka Lama ka Ri ym lah ban pynlong kum ki jingsong tiar, ym lah ban tap ïa ki jingkhangït kali, ne ki bynta ba shadien jong ki kali.
Lada jia ba ka Lama jong Ri kala sniew dei ban pynduh noh ïa ka baroh kawei da kaba leh ha ki jaka ba long kyrpang ym ha ki jaka paidbah, lah ban shu thang ne tep ne da kino kino ki bynta hynrei dei ban leh ryngkat ka jingburom ïa ka.
Ïa kito ki Lama ka Ri kiba kiba rit ba la shna da ki kot ba ju pyndonkam haba kaweh ha ki jaka paidbah, ym dei ban shu bret pathar sha madan, hynrei ïa kine ruh dei ban pynlang shi jaka ban ïoh pynduhnoh ïa ki ha ki jaka ba long kyrpang ha ryngkat ka jingkheinkor bad burom ïa ki.
