Da ki Wheel Chair ïoh jingmyntoi 52 ngut ki khynnah ba duna dkhotmet na ka ALIMCO

Mawkyrwat, ‘Nailar, 11: Ka ophis jong ka District Mission Co-ordinator, Samagra Shiksha Abhiyan (SSA) ha ryngkat ka jingïatreilang bad ka ALIMCO RMC Guwahati Conduct mynta ka sngi ka la ïoh ban sam ïa ki tiar kyrshan sha ki khynnah ba donkam ki jingïarap ba kyrpang Children with Special Needs (CwSNs) ba kin ïoh pyndonkam ha manla ka sngi (Aids & Appliances) kiba hap hapoh jong ka Mawkyrwat bad Ranikor Block ha kaba u bah Renikton Lyngdoh Tongkhar, Nongmihkhmat ka Mawkyrwat Constituency bad Myntri ka tnad umbam umdih jong ka Sorkar jylla u la long kum u kongsan.
Ki khynnah kiba donkam ka jingïarap ba kyrpang ha kane ka sngi ki don baroh 52 ngut kata 41 ngut na Mawkyrwat Block bad 11 ngut pat na Ranikor Block ha kaba ïa ki tiar kyrshan kum ki ‘Wheel Chair’ bad kiwei de la aiti da u nongmihkhmat ka Mawkyrwat Constituency, bah Renikton Lyngdoh Tongkhar uba dei ruh u kum Myntri jong ka Sorkar jylla ha ryngkat ka jingsakhi lang jong ki kmie ki kpa jong ki khynnah kiba donkam ka jingïarap kaba kyrpang lem bad ki nongtrei sorkar jong ka Block Mission Co-ordinator Officer bad kiwei de.
U bah Renikton Lyngdoh Tongkhar haba kren kum u kongsan ha ka jingïalang u la ai mynsiem ïa ki kmie ki kpa kiba don ïa ki khun kiba don ka jingduna ha ki dkhot met ne lah ban ong ha kawei pat ka kyntien ‘kiba don ïa ka jinglah kaba kyrpang’ ba kim dei ba don ka jingmynsiem jong ka jingsngewdiaw hynrei kumba ki ai ka jingieit ïa ki khun ba bit ba biang, ki dei ruh ba ai lang ïa kajuh hi ka jingieit khnang ba ma ki ruh kin ïoh mynsiem ha ka lawei ka ban sa wan.
Ha kaba ïadei bad ka pule puthi pat, u la kyntu ba kum ki kmie ki kpa ki dei ban thaw ki lad ki lynti ban ai kajuh ka jingnang jingstad da kaba wad ki jingïarap na kylleng bad kumjuh ruh na ki bor sorkar namar ma ki ruh ki don ïa ka hok ban pule kumba long lem kiwei dei ki para khynnah. Namarkata, u la buh ka jingkyrpad ba ban pyntyllun ïa kiba bun kam na ka bynta kine ki briew kiba donkam ka jingïarap ba kyrpang ka donkam ïa ka jingïatreilang jong baroh ki briew naduh ki kmie ki kpa, ki ophisar sorkar bad kumjuh ruh na ki nongmihkhmat.
U bah Renikton ha ka jingkren jong u u la ïathuh ruh ba ha kaba ïa dei bad ka bha thungkam thungjam, na ka liang ka sorkar ruh ka la don la ka bhah na ka bynta jong ki briew kiba don ka jingduna ha ki dkhot met lyngba ka percentage. Kumta u la ong ba ka long kaba dei ba ki kmie ki dei ban ïaleh tyngeh katba lah ban phah sha ki skul pule ba kyrpang na ka bynta jong ki ruh khnang ba ka lawei jong ki kan long kaba phyrnai kumba ïoh ki khun kiba bit ba biang ha ki dkhot met. “Ki khun kiba don ka jingduna ha ki dkhot met ki donkam shisha ban don ki skul kiba kyrpang bad ka sorkar ruh ka dei ban shimkhia ïa kane ka bynta”, ong u bah Renik bad u da kular ruh ba un sa shimkhia ban kren lem ha ka sorkar halor kane ka bynta ba ki skul ha kylleng jong ki shnong ki dei ban don ka jingbhah ba kyrpang ba ïa ki nonghikai kiba la don lypa ki dei ban phah sha ki jaka shah hikai ban long kiba bit ban hikai ïa ki khynnah kiba don ka jingduna ha ki dkhot met.
Ka kong M. Kharbangar, State IE Co-ordinator, SSA, SEMAM, Meghalaya, Shillong ha ka jingkren jong ka ka la ai khublei kyrpang na ka bynta u nongmihkhmat jong ka Mawkyrwat Constituency uba la pynïoh ïa ki ‘Income Certificate’ kiba biang ha kaba mynta ka sngi kine ki 52 ngut kiba don ka jingduna ha ki dkhot met ryngkat kiba ha ïing ki la ïoh ban wan shim bad pdiang ïa kine ki tiar da ka jingkmen. Ka la ïathuh ruh ba ban kynthup ïa ki khynnah kiba don ka jingduna ha ki dkhot met ha ki skul pule ka dei naduh u snem 2005 ter ter hynrei ha kaba sdang hi ka long kaba eh shibun ban pyntyllun ïa ki kam. “Ha ka jingkheiñ ïa ka jingdon jong ki briew kiba duna ha ki dkhot met katkum u snem 2011 ki don haduh 44 hajar tam ei ei”, ka la ong.
Ha kajuh ka por ka kong Kharbangar ka la ïathuh ba hapoh ka Jylla Meghalaya katkum ka jingbthah jong ka Sorkar India napoh Delhi lyngba ka Supreme Court ka donkam haduh 432 ngut ki nonghikai kiba kyrpang ha manla ki level, hynrei kaba sngewsih pat ka long ka jylla jong ngi ka duna palat ïa kum kita ki briew. Namarkata, ka la ai ka jingpynshlur ïa ki samla pule jong kane ka juk ba kin ïaleh ban leit ban pyntbit ïa lade ban hikai ruh na ka bynta ki khynnah kiba donkam ki jingïarap ba kyrpang ne ki Children with Special Needs (CwSNs).
“Haduh mynta ki don haduh 7287 ki khynnah kiba don ka jingduna ha ki dkhot met kiba la shah kynthup ba kin ïoh ki lad jingïarap ha ka pule puthi kata ha ki Pre-Primary naduh 3 – 6 snem ki don haduh 520 ngut, ha ka Elementary Level ki don haduh 4087 ngut, bad ha ka Secondary Level pat ki dang duna shibun bad ki don tang 318 ngut”, ong ka kong Kharbangar. Nangta ha ka Home Base Programme (HBP) ki kynthup haduh 1368 ngut ha ka jylla Meghalaya baroh kawei bad mynta pat ki don sa ïa ki School Readiness Programme (SRP) kiba dei na ka bynta ki khynnah ba dang pynkhreh ban pynrung ha ki skul bad ïa kane ka bynta haduh mynta ka la nang ïaid shakhmat.
Ïa ka jingïalang la pynïaid da ka kong D. Thongni, IED Co-ordinator, SSA South West Khasi Hills District ha ryngkat ka jingïadonlang ruh naduh ka kong S. Kharsahnoh, District Mission Co-ordinator, SSA, Mawkyrwat, bad ka kong B.K. Syiemlieh, Special Educator, RMSA, South West Khasi Hills District.