Shillong, Nailar, 10: U National Vice President ka National People’s Party (NPP) u Bah Prestone Tynsong uba long ruh u Myntri Rangbah ka Jylla ha ka sngi Balang u la bthah ïa ki MLA jong ka All India Trinamool Congress (AITC) kaba shong ha ka Liang Pyrshah ka Ingdorbar Thawaiñ ba kin leit pynïasoh bad ka Bharatiya Janata Party (BJP) shwa ka elekshon sha ka Ingdorbar Thawaiñ ka ban sa long ha u snem 2023 hapoh ka jylla.
“Nga tharai ki (AITC) donkam ban leit ïasoh bad ka BJP, kan jin da la bha shikatdei eh ïa ki. Kan biang palat lada ki leit ïasoh bad ka BJP shwa ka elekshon,” ong u Bah Prestone haba ïakren bad ki lad pathai khubor haba jubab ïa ka jingkylli halor ka lawei jong ka AITC kaba dang long ka seng saiñpyrthei kaba thymmai ha ka jylli jong ka saiñpyrthei ha kane ka jylla Meghalaya na ka bynta u snem 2023.
“Lada u Dr. Mukul Sangma bad u Bah Charles Pyngrope ki kwah ïa ka jingmut jong nga, ngi lah ban ïashong pyrkhat lang bad ki bad ngin sa ai jingmut ïa ki ba kin leit pynïasoh bad ka BJP shwa ka Elekshon,” u la bynrap.
Haba kyntait ban kdew ïa ki daw halor kane ka jingai jingmut, u Bah Prestone u la ong, “balei ngan shu batai bniah halor kata, balei ngan shu pynshai halor kata…nga tip hynrei nga ladep ong shwa ka elekshon kan bha ïa ki ban leit pynïasoh bad ka BJP.”
Ïa mynta ka AITC ka la trei borbah bad ka la pyrshang ban rung sha manla ki shnong ki thaw bad ki kyndong kynshot jong ka jylla khnang ban thaw ïa ki ktem bakhlaiñ shwa ka Elekshon. Watla ka AITC ka long tang ma ka, kaba shong ha ka Liang Pyrshah hapoh ka Ingdorbar Thawaiñ hadien ba ki 12 ngut ki MLA ki la phet noh na ka Seng Congress ha u snem baladep, ka jingïakhun ka ban sa long ha u snem 2023 kan shong eh la ki paidbah ki kloi neem ban pdiang ïa kane ka party.
U Bah Prestone u la kynnoh shuh shuh ba ka jingïathuh lypa jong u Dr. Mukul Sangma na ka bynta u snem 2023 kan long “zero”.
“Nga tharai phi dang kynmaw shai bha, u Mukul ha kato ka por haba u dang long u Myntri Rangbah naduh u snem 2010 haduh 2018. Hadien u snem 2010 shakhmat ngi la pynkhreh ban leit sha ka Election ha u snem 2013 bad ka jingïathuh lypa jong u ka dei sbiak, hynrei ka jingïathuh lypa na ka bynta u snem 2013-2018 ka la lait sharud khlem ïahap eiei ruh em bad ka jingïathuh lypa jong u na ka bynta u snem 2018-2023 ka long Zero. Tang kata,” u la ong .
Ha kawei pat ka liang ka BJP ka ladep ai ksai ba ka la don ka jingïakren bad u MLA ka AITC na Mawsynram u Bah Himalaya Shangpliang uba la pynpaw ba u don ka jingkwah ban ïakhun na ka elekshon na ka tiket jong ka BJP ha u snem 2023.
Ha ka sngi Baar, palat shi spah ngut ki nongkyrshan jong ka AITC na Mawsynram ki la leit pynïasoh sha ka BJP.
