Shillong, Nailar, 10: U National Vice President jong ka NPP u Bah Prestone Tynsong ha ka sngi Balang u la ong ka histori kan sa wan phai biang na ka bynta ka seng Congress ha ka Elekshon sha ka Iingdorbar Thawaiñ ka Jylla ka ban sa long ha u snem 2023 hapoh kane ka jylla.
Haba ïathuh lypa shaphang ka lawei jong ka seng Congress ha ka elekshon ka ban sa long, u Bah Prestone uba long ruh u Symbud Myntri Rangbah ka Jylla bad u nongïalam ba mynshwa jong ka Seng Congress ka party kaba la rim tam hapoh ka ri, u la ong ba ka Congress ka donkam ban pynkhlaiñ suh shuh ïa la ka nongrim.
“Ki la poi biang sha kaba mynshwa,” u la ong.
Haba ïathuh ba ha u snem 1972 haba ka Congress ka jop tang khyndiat tylli ki Seat, u Bah Prestone u la ong, “mynta ka histori la phaidien biang. Kin hap ban leit phai biang ban bishar ïa ka jinglong jingman ha u snem 1972.”
Une u nongïalam jong ka NPP u la ong ba u sngewkmen ba ki MLA barim jong ka Congress ki la shah skhor da kaba kynthih noh na ka jhad kaba la ngam khnang ban pyllait im ïalade na ka jingngam jyllop.
Na ki 17 ngut ki MLA ka seng Congress, 12 ngut ki la pynïasoh bad ka All India Trinamool Congress (AITC) katba san ngut kiwei pat, kiba la shah beh seng shipor, ki lah ban leit pynïasoh bad kiwei kiwei ki party shwa ka elekshon jong u snem 2023.
