Jowai, Nailar 10: Ka ‘Khooid Ya Ka Wah Myntdu’ (KYM) ha kane ka 9 tarik hapoh ka jingïalam khmat jong u ma Bichar Shylla Vice President, ka kong Hunbeitki Dkhar Assistant General Secretary bad u ma D. H. Pde ha ryngkat ki dkhot ka Executive Committee, kila leit ban sakhi halor ka rukom pynkhuid ïa ka Water Treatment Plant ka PHE kaba don ha Urkhla Khimusniang Jowai.
Ha kane ka sngi la ïadonlang u ma P. Synnah Executive Engineer ka PHE (Electrical) uba la pynsngew na ka liang ka ophis kala ju pynkhuid man ka por ïa katei ka jaka tan umbam hynrei la ïohi da ki dkhot ka KYM halor ka jingjaboh jong ka tei ka jaka pyllang umbam kala dap pynban satang da ka khyndew.
Hynrei utei u ophisar ula ïathuh manka por la ju pynkhuid ïa katei ka jaka pyllang umbam hynrei ka jingbun palat ka ka khyndew kala buh jingeh bha ïa ka ophis ban pynkhuid ïa ka umbam kaba dei ban sam sha ki paidbah nongshong shnong ka Jowai.
Ulaïiathuh ruh wat na ka liang u Deputy Commissioner ka WJHD bah Garod LSN Dykes (IAS) ula pynmih ka hukum ban pynkhuid ïa katei ka jaka pyllang umbam jong ka tnad PHE haduh saw sien ha ka shisnem.
Na ka liang ka Khooid Ya Ka Wah Myntdu kala pyntip ha kine ki sngi ban wan kan sa leit ban jurip ïa baroh ki jaka pyllang umbam jong ka tnad PHE kiba don ha sor Jowai halor ka jinglong jingman jong ki.
Katkum ka jinglap jong ka KYM ha katei ka jaka pyllang umbam ha Urkhla kiba bun hi ki dap satang da ka khyndew jaboh bad kane ka paw ba ka kam don satia ka jingpynkhuid da ki bun bun bnai namar wat ka um kor ruh ka long hi kaba jngiar hynrei ynda la dep pynthnam kala kylla rong dpei.
Halor kane ka KYM ka buh ka jingkyrpad kumjuh ïa ka ophis u SDO PHE (Electrical) ba kan ïaleh katba lah ban pynkhuid ïa katei ka jaka pyllang umbam hashwa ban sam umbam sha ki paidbah khnang ban lait na ka jingpang jingshitom.
La kyrpad ruh ïa u CEM JHADC bad ïa u DC WJHD ba kin hukum ïa ki tnad kiba dei peit ba kin ïaleh ban pynneh pynsah ïa ka jingkhuid ka wah myntdu da kaba kem bad pynshitom tyngeh ïa kiba theh kyndew pathar sha ki bynta ka Wah Myntdu.
Haka juh ka por ka KYM lyngba u President ma Khroo L Pariat ka kyntu ïa ki nongshong shnong ka sor Jowai kiba don ha sawdong jong ka wah myntdu naduh na Mihmyntdu, Khliehtyrchi, ki shnong ha Jowai haduh shnong Ïalong bad Tuber ter ter ba kin ïasnohkti lang ban tehlakam ïa ka rukom bret pathar ïa ki jaboh sha ki bynta ka wah Myntdu.
