Mawkyrwat, ‘Nailar, 10: Ka Hynñiewtrep National Youth’s Front (HNYF) jong ka South West Khasi Hills District ha Press Conference hapoh ka jingïalam jong u Khrawbok Snaitang, President ka HNYF ki la pynpaw bad ïeng skhem ba horkit hordang da lei lei kan nym ai lad ïa ka sorkar India ba kan wan mushlia da kaba wan khlong ïa u marpoh khyndew na kane ka dong ka thaiñ bad na ka South West Khasi Hills District.
Haba kren ha ki lad pathai khubor, bah Khrawbok Snaitang, President jong ka HNYF, South West Khasi Hills District ha ryngkat ki dkhot jong ka seng ki la pynpaw ba hadien ba ka sorkar India ka la pynbna ba kam shem la pyndam noh ïa ka jingthmu ban tieh ïa u marpoh khyndew ne u Uranium hapoh ka jylla Meghalaya. Kumta na ka liang ka seng da kawei sur kan ym ai lad da lei lei ïa ka sorkar India bad ïa ka sorkar jylla ban wan leh mushlia bad lada jia ba ka sorkar kan leh donbor kum ka seng kam banse ban hap ïeng ïaleh wat lada jia ba haduh ban da jaw ne phlei ka snam ha madan ruh.
Ha kajuh ka por ka seng ka la buh ruh ka jingkyntu ïa ki 60 ngut ki MLA jong ka jylla Meghalaya ba kin kren ei ei ban ïeng pyrshah halor kane ka bynta bad kumjuh ruh ki la kyntu ïa ka Khasi Hills Autonomous District Council (KHADC) kaba dei ka nongpeit nongjngoh ïa ka khyndew ka shyiap ba da lei lei kam dei ban ai jingbit ne ai NOC ïa ka sorkar ne kino kino ki kompany namar ki tip shai lada tih ïa une u marpoh khyndew ka long shisha kaba ma bad ka ban sa pynjot ïa baroh ki jingthaw ba im ha ka pyrthei.
U bah Khrawbok Snaitang, President jong ka HNYF u la ong ruh ba kumba ka mei-ieid Spility Lyngdoh Langrin bad u bah Hopingstone Lyngdoh (bam kwai ha dwar U Blei) ki la ïeng ïaleh ban pyrshah ïa ka sorkar India lyngba ka kompany UCIL kaba la mut ban wan tih ne khlong ïa u Uranium hapoh ka ri khasi ha ki por ba mynshwa, ba ki tip shai ba lada tih ïa u uranium kan long ka jingma kaba khraw namar u don ha ka ïa ka bih kaba shyrkhei bad ka ban sa ktah ïa shibun ki kynja ba im ki doh um doh wah khamtam ïa ki briew.
Namarkata, ka seng ka kren shai ba ïa kitei ki kyntien jong kitei ki nongïalam ba hakhmat kin bat skhem bad bat ïa ki kular namar lada jia ka sorkar India bad ka sorkar Meghalaya kin leh donbor halor u Uranium, ka seng ruh ka la long ba la khreh ban ïaleh.
Ha kane ka sngi la synrang lang ruh da u Khrawbok Mawleiñ, Secretary ka jong HNYF, South West Khasi Hills District ha ryngkat ki dkhot jong ka seng.
