Shillong, Nailar 07 : Ka kynhun ki thei ïalehkai ka Lapalang Sports Club ka la rah ïa ka nam lahduh jong ka lympung ïalehkai kynjatbol kaba nyngkong kaba la pyllong ka Riwar Mihngi Sports Association (RMSA) ha ka jingïakhun kaba la long ha ka sngi Saitjaiñ ha madan Block, Pynursla.
Ki thei ka Lapalang ki la pynliem ïa ki thei ka Nongmadan Sports Club da 1-0 kol ha ka jingïakhun kaba ïakhaid bha bad shongshit na ka jingdon ki nongkyrshan na baroh ar liang bad ki paidbah nongpeitkai.
Ïa kane ka kol la thep ka thei ïalehkai ka Inri la I dor Khongthaw ha ka kyllamiet hadien ba ka kylla step ka la ïakhaid khlem don ba lah ban thep kol.
Ka lahduh ka la ïoh khur ïa ka song pisa kaba T. 20 hajar lem bad ka khusnam katba kaba long baar ka la ïoh 10 hajar ryngkat ka khusnam. Ïa ka nam best goalkeeper la ïoh ka nongïalehkai ka Lapalang ka Tresita Dkhar (Lapalang SC), ïa ka nam best player la ïoh ka Ribashisha Khongwet (Nongmadan SC) na ka Nongmadan bad ïa ka nam top scorer la ïoh ka Inri la i dor Khongthaw (Lapalang SC).
La sam ïa ka khusnam sha ka lahduh da u Bah Edmund Khongngai uban ïakhun ha ka elekshon MLA na AITC na Pynursla, ha ka jingdonlang u khlur ïalehkai ka ri u Bah Aiborlang Khongjee, ki nongkitkam ka RMSA, u bah Namshai Ryngksai, Bah Kevin Suting, Bah Jurius Majaw, u Bah Siniphil B Tariang, bad kiwei.
