Ka Sorkar ka la shimkhia ban peitngor ban ym ïoh wan rung ki lehnoh Jihadi: CM

Shillong, Nailar 06 : U Myntri Rangbah ka jylla u Conrad K Sangma u la ong ba ka sorkar ka la shim khia bad peitngor bha hadien ba kala ïoh jingtip ba ki lehnoh Jihadi ki la sdang ban wan rieh tngen bad pynrung dkhot ïa ki samla ha Assam.
“ Ngin peitngor bha bad ki pulit kin pynthikna ba baroh ki tnad syntiat jongka kin long kiba ïai peitngor bad peit thuh bha ha kylleng ki jaka bad kyndong kynshrot jongka jylla” ong u Myntri Rangbah haba ïakren bad ki nongthoh khubor.
Ym tang ki tnad syntiat hynrei wat ka tnad talasi mynder ka Infiltration run kan pynkhlain ïa ka rukom talasi jongka haba don kiba wan rung sha ka jylla khlem ki kot ki sla kiba biang. “ Nga kyrpad ruh ïa ki Dorbar Shnong ban ïatrei lang bad ki pulit ha ki Thanad bapher bapher khnang ba lada jia ba ki ïoh jingtip ba don ki riew phylla kiba wan rung ha ki shnong ki thaw kin sngewbha ban ai jingtip mar mar sha ki bor pulit ba kin ïoh ban leh ïa kaba donkam” ong u Myntri Rangbah.
Ka Assam ba ki don ki dkhot jongka Ansarul Islam kiba la ïoh rung sha u pud u sam jongka bad kila sdang ban pynrung dkhot ïa ki samla. Ka Ansarul Islam ka dei ka seng lehnoh na Bangladesh. Ka sorkar Assam ka la ïoh jingtip ba ki don hynriew ngut ki dkhot katei ka seng kiba rung sha Assam bad ïa uwei la ïoh kem da ki pulit na Barpeta ha u Lber mynta u snem. U Himanta Biswa Sarma Myntri Rangbah ka Assam haba kren dang shen sha ki lad pathai khubor dang shen u la ong ba ki pulit ka Assam ki trei shitom bha ban ïoh kem ïa kitei ki san ngut kiwei pat kiba dang rieh tngen ha Assam. Ki la don kumba 29 ngut ei ei ki briew kiba la suba ba ki la rung dkhot sha katei ka seng lehnoh ba la ïoh ban kem da ki pulit ka Assam kat haduh mynta.
Na ka liang ka HYC ha ka jingpyllait khubor jongka ka la pynpaw ka jingsngew syier ïoh kitei ki lehnoh Jihadi ki pynlong ïa kane ka jylla Meghalaya kum ka jaka rieh tngen jongki namar ym don ki ain ba pyrkhing ban ïada ïa ka jingwan rung ki mynder sha kane ka jylla kata kum ka ILP bad ka MRSSA.
U General Secretary ka HYC u bah Roykupar Synrem u la ong ba ka Assam mynta ka la long kawei na ki jylla kane ka thain ba ki lehnoh Jihadi kil a sdang ban leh ïa ki kam jongki bad ïa kane la pynthikna na ka jingïoh kem jong ki pulit ïa kiba bun ngut ki dkhot jong ki seng lehnoh Jihadi ha Assam. Ka Meghalaya ka don u pud uba 800 Km bad ka Assam bad kumba 443 Km bad ka Bangladesh bad kane hi ka la pynsyier lypa namar bym biang ki ain ba pyrkhing ïa ka rung ka mih kiwei ki jaidbynriew.
U la pynpaw hooid na ka liang u myntri rangbah ula pynpaw ba ka sorkar lyngba ki bor pulit jongka kan peitngor bha ïa ka ïaid ka ieng jong ki briew hynrei kaba sheptieng pat ka long ba ïoh ka jingwan rung ki briew kiba na Assam sha ka jylla ka long laitlan namar bym don kitei ki ain.
U la ong ka jingïai dawa ba pyntreikam ïa ka ILP bad ka MRSSA ka long ban pynthikna ba ka jingwan rung ki briew sha kane ka jylla kan ym long laitlan palat bad lyngba kitei ki ain kan wanrah ruh ka jingshngain ïa ki paid nongshong shnong ka jylla hynrei haduh mynta pat kine ki ain ki shu sahkut ha shiteng suin.
Wat la ïa ka ILP la dep mynjur da ka Resolution ban pyntreikam ha ka jylla bad ïa ka MRSSA Bill 2020 la dep mynjur da ka Iing Dorbar hynrei kitei ki ain ki sahkut ha ka jingbishar ba khlem kut trai ne kut por shuh jong kata ka tnad kam pohiing ka ri India.
Ïa ka jingdawa ban ïalam ïa baroh 60ngut ki MLA ban leit sha Delhi ban dawa ïa ka ILP ruh la nang ïai sah kut beit bad ka sorkar jylla bad la nang ïai bishar beit da u myntri rangbah. Kat kiba don ki mat treikam kiba kongsan la sahkut beit ha ki jingbishar ne dang ïai eksamin. Kane ka long kei kaei kaba sngewsih ïa ka jylla katba ïaka jingai kam kontrak pat shawei te kam don jingslem namar ba kloi tuid ka dud bad ka ngap.
Kumta ka HYC ka dawa ba ka sorkar kan shim ka jingkitkhlieh lada jïa ba kine ki lehnoh Jihadi ki leh ïa kino kino ki kam pyntriem kiba ktah ïa ka jingim briew ha kane ka jylla.