Nongstoiñ, Nailar 6: La kumba shisnem tam ka sorkar kam shym la pyntreikam shuh ïa ka skhim Mahatma National Rural Employment Guarantee Scheme ha ki 48 tylli ki shnong kiba hap ha ka Mawthadraishan C&RD Block, ong u bah Charles Sohshang haba ïakren bad u nongthoh khubor mynta ka sngi. Ha kaba ïadei bad ka jingbym pyntrei kam shuh jong ka sorkar ïa katei ka skhim ha kitei ki sawphew phra tylli ki shnong, u bah Sohshang u la ong ba ki don ki shnong kiba hap ha ka Nongstoiñ, Rambrai Jyrngam bad Mawthdaraishan Constituency.
Ha kajuh ka por u la ong ba ka jingpynsangeh ban pyntrei ïa katei ka skhim ka la sdang naduh ba la pynkha thymmai ïa ka Eatern West Khasi Hills, namar ki don shibun ki shnong kiba la pynhap ha Eastern West Khasi Hills, katba ki Constituency pat ki hap ha West Khasi Hills. Hynrei haduh mynta ka sorkar kam shym pat la lah ban pyndep ha ka ban pynbit pynbiang ïa kiba bun ki jingdonkam bad wat ban pynthikna ïa u laiñ u ba pynïakhlad ïa ki shnong ki thaw, ki jaka ki puta kiba dei ban pynhap ha Eastern West bad West Khasi Hills. Lehse dei na katei ka daw ba ka sorkar ka la pynsangeh noh ban pyntreikam ïa ka skhim shispah sngi.
Nalor kata u la ong ba wat tang ïa ka pisa jong ki jingtrei kiba la dep pyntrei shuwa ban phiah District, kaba dei tang ka pisa bai thied tiar jong kitei ki sawphew phra tylli ki shnong, ka sorkar kam pat shym la lah ban siew dep bad lada kheiñ lang ka la poi da ki spah klur tyngka.
U bah Sohshang u la ong ruh ba ka jingpynsangeh jong ka sorkar ïa ka jingpyntrei ïa ka skhim shispah sngi ha kine ki shisnem tam mynta, ka la ktah haduh katta katta ïa ka ïoh ka kot jong ki longïing long sem bad da ki hajar ngut ki job cards ki la duh ïa ki kam bylla kam sngi jong ki.
Ha kajuh ka por u la ong ba kiba bun ki job cards holder ki dei ki nongrep bad ki nongbylla, hynrei naduh ba ka khlam covid 19 ka la wan lynshop ha ka jylla ka la jingkyrduh bylla ka la ktah haduh katta katta ha ki shnong ki thaw bad haman la ki jaka.
U la ong ba ka sorkar ka la dei ban pynsted ha ka ban pynbiang ïa ki jingdonkam ban pynbeit, ha ka ban pynrung ha Eastern West bad West Khasi Hills bad lada kan dang shim por kham slem ruh, kan sngewbha ban nang pyllait noh tang ïa ka pisa bai thied tiar na ka bynta ka jingpyntrei ïa ka skhim shi spah sngi na ka bynta ki snem kiba la dep.
