Shillong, Nailar 04: Hadien saw sngi ba ki nonghikai contract ki la pynlong ïa ka jingïakhih da kaba shong sah miet ha khmat ka ophis jong ka MBOSE ha ka sngi Palei u Myntri Rangbah ka jylla u la khot ïakren ïa kine ki nonghikai hynrei kane ka jingleit ïakynduh jong ki nonghikai kam long kaba seisoh ïathuh u President.
Haba kren bad ki nongthoh khubor u President jong Meghalaya Government Lower Primary School Contractual Teachers Association(MGLPCTA) u Babu Birbor Riangtem hadien ba la mih na ka kamra u Myntri Rangbah u la ong ba ka jingïakren bad u Myntri Rangbah ka long ka bym seisoh namar ka sorkar ka kren da kaba shai ba kan nym lah ban leh eiei ïa ka jingdawa ki nonghikai.
U Babu Birbor u la ïathuh ruh ba ha ka jingïakren u wei u nonghikai uba don jingduna dkhot met u la jaw ummat brup hakhmat u Myntri Rangbah namar ba u ong ba na ka liang ka sorkar kam lah ban ai kam biang ïa kine ki nonghikai.
“Kane ka jingïakren ka bad u Myntri Rangbah kam long kaba pynhun tang khyndiat ruh ïa ngi’
Haba la kylli pat kaei ka sienjam kaba kin shim u Babu Birbor u la ïathuh ba na ka liang jong ki kin sa shong pyrkhat mynta ka miet ïa ka sienjam “ngin dang bteng ïa ka jingïakhih tangba kiba kumno pat ngin sa shim rai mynta ka sngi” u la ïathuh.
Haba ïadei bad ka jingkam jong u Myntri ka tnad pule ba ka sorkar ka la ai lad ïa ki ban thoh MTET wat la ki la tam ka rta u Babu Birbor u la ong ba kane ka jingleh ka sorkar ka long tang ka jingrïam ïa ki.
“Ngi la don 40 snem tam ka rta kan shem shitom bha ruh ba ngin hap long khynnah skul biang bad kan buh jingeh ruh la ngin khreh kot ïa lade ne nghin pynleit jingmut ïa ki khynnah kiba shaniah ha ka jiinghikai jong ngi” u la ong
Shuh shuh u Babu Birbor u la ong ba kane ka jingmih ka jingeh ïa ki nonghikai ka long namar ka sorkar naduh u snem 2010 kam shim khia ban pyntreikam ïa ka National Council for Teachers Education hynrei ynda ka sorkar MDA ka la pyntreikam ruh kam pynbeit satia ïa ka jingduna kaba ka sorkar ba rim ka bakla. U la ïathuh ruh ba ha kiwei ki jylla ka sorkar ka ai lad kyrpang ba kin leh la ka jong ka eksam na bynta kito kiba la don ha ka kam.
Haba la kylli pat balei kum ki nonghikai contract kin ïoh kam pura u Babu Birbor u la ong “Ka dei ka jingshisha ba ngi shah khot ban hikai kum ki nonghikai contract na bynta 59 sngi hynrei nga kwah ban ïoh jubab na ka sorkar balei pat ka phah hikai ïa ngi 15 snem”
