Shillong, Nailar 4 : Na ka daw ka jingslem palat ban pyndep ïa ka surok PMGSY ha ka shnong Rongsak, West Garo Hills bad bym pat lait ïaid ki kali khamtam ha kine ki por slap kumta ki riew rangbah ki la hap bah da ka krong ïa uwei u rangbah briew uba la mynsaw jur namar u la hap nalor diengkwai katba u dang kheit kwai mynta ka sngi 4 tarik ha katei ka shnong.
Hadien ba une u rangbah u la hap nalor diengkwai bad u la shitom jur bha kiba haïing hasem bad ki para marjan ki la kulmar jingmut kumno yn leh namar la idonkam ban leit rah ïa u sha hospital. Kumta kim banse ban shna da ka krong ban ïa bah ïa u ban pynpoi sha jaka sumar.
Kane ka surok kaba pynïasoh ïaka shnong Rongsak sha Denajekgre ka dang sniew bha namar ka kontraktor ka khlem pyndep ban shna ïa ka wat la san snem lynter mynta ruh. La ïathuh ba la sdang ban shna ïa kane ka surok naduh u snem 2018 hynrei haduh mynta u 2022 ruh ym pat lah ban pyndep satia. Ym dei tangba ym pat lah ban pyndep hynrei ka jinglong jongka surok ka la nangsniew nangsniew arshah.
Ka kontraktor kaba ïoh ban shna ïa kane ka surok ka dei ka S.M Sangma. Ki paid nongshong shnong ki pynpaw ka jingsngew pyrshah jur halor ka jingkheiñ sting jong kane ka kontraktor ban pyndep ïa ka surok namar ka la buh palat ïa ki paidbah ha ka jingeh khamtam ha ka pang ka shitom ba ki hap ban ban kit da ka krong ban pynpoi ïa ki nongpang sha hospital.
