Shillong, Nailar 04: Ka National HynñiewtrePeople’s Federation ha ka sngi Palei ka la kam ba ki karkhana ba don ha Umïam bad Byrnihat kim shym la siew satia ïa ka bai thang bording naduh u snem 2005 kaba la kot kumba 44 klur.
U President ka NHPF u Bah Andreas Nongkynrih haba kren bad ki lad pathai khubor u la ïathuh kat kum ka jingtip kiba la ïoh lyngba ka RTI kaba la pan na ka ophis jong u Chief Engineer jong ka Meghalaya Power Distribution Corporation Limited (MePDCL) bad la shem ba 36 tylli ki karkhana ha Umïam bad 22 tylli ha Byrnihat kim pat siew ïa ka bai thang bording kaba lada kynthup lang ka lah kot 44.57 klur.
“Ki nongshong shnong ka ri Bhoi district kim lah satia ban pdiang ïa ka jingleh shilliang jong ka MePDCL namart lada ki kompeni bad ki karkhana kim siew bai thang bording kaba kot da ki klur ka tnad kam leh eiei katba lada dei ïa u riewpaidbah lada um siew wat tang da ki hajar tyngka ruh ka MePDCL ka beh thong wat ban ot noh ïa ka jingai bording sha ki” u la ong
Shuh shuh u President u Bah Andreas Nongkynrih u la ong ba katkum ka jubab RTI la shem ba tang na ki karkhana kiba don ha Umïam ki bym pat siew ïa ka bai thang bording ka kot haduh 2,49,35,849/-Tyngka katba ka bai thang bording jong ki 22 tylli ki karkhana kiba don Byrnihat kaba kim pat siew ka la kot haduh 44,57,39,903/-Tyngka.
U la buh jingkylli ïa ka tnat MePDCL ba balei ïa ki riewpaidbah ka pyrkhing bha lada kim siew ïa ka bai thang bording hynrei katba ïa kine ki karkhana da ki klur tyngka kam leh eiei.
