Shillong, Naitung : U kyrtong ba ju ïakhun pyrshah ïa ka Dr. Ampareen Lyngdoh ha ka elekshon na Laitumkhrah constituency (mynta ka Shillong East) ha ki snem ba la dep, Bah Malcom Tariang u la pynmih ïa ka kyrteng jong katei ka MLA ha ka jingïalang jong ka NPP kaba long ha ophis treikam jong ka NPP ha kane ka sngi Palei.
Ka jingpynmih jong u Bah Malcom ïa ka kyrteng jong ka Dr.Ampareen kaba dei ruh ka MLA ba mynta na katei ka thaiñ kadei ha ka sngi ba la pdiang burom ïa u sha ka NPP ha ka jingïalang kaba donlang ruh naduh u Myntri Rangbah ka jylla Conrad K Sangma ba dei ruh u National President ka party bad kumjuh ruh u National Vice President bad Symbud Myntri Rangbah ka jylla, Bah Prestone Tynsong.
“Watla haduh mynta kam pat dei ka dkhot jong ka NPP, hynrei nga sngew ban ai burom ïa ka jingnoh synñiang jong ka Kong Ampareen Lyngdoh. Ka lah ban poi hangne mynta lane ka lah ban poi kham hadien ruh,” ong u Bah Malcom da kaba pynpaw ïa ka jingsngewnguh ïa ka Shillong East NPP kiba la pdiang sngewbha ïa u.
Katei ka jingkren jong utei u rangbah ka la pynlong ïa jan baroh ki nongïalam ka NPP ban phuhmut phuhmat lut kynthup naduh u Conrad haduh u Bah Prestone Tynsong.
U Bah Malcom u la ïathuh ruh ba kitei ki briew kidei kiba u la ithuh naduh mynshwa tangba ha la ka jong ka jong ka rynsan la bun bun snem mynta.
Watla na ka liang ka NPP ka la dep ban pdiang burom ïa u Bah Fantine Joseph Lakadong, kurim jong ka Kong Ampareen Lyngdoh sha ka party bad ruh ïa ka party jong katei ka MLA, Dr. Jasmine Lyngdoh kum ka kyrtong jong ka party na Nongthymmai hynrei naka liang ki heh ka NPP kim pat treh ban kren ei ei haba ïadei bad katei katei ka MLA.
