Ban pynkhlaiñ ïa ka jingpahara ha khappud India – Myanmar, ha Shillong ïatai ka Assam Rifles Commanders

Shillong, Naiwieng 14 : Ka Assam Rifles Commanders’ Conference 2026 ka la long naduh ka 12 – 13 Naiwieng 2026 ha ka Headquarters Directorate General Assam Rifles, Laitkor, Shillong hapoh ka jingïalam u Lt Gen Vikas Lakhera, AVSM, SM, Director General Assam Rifles ka la ïatai sani bha na ka bynta ban pykhlain shuh shuh ïa ki bor pahara khamtam eh haba ïadei bad ka khappud jong ka India bad Myanmar.
Ha kane ka conference kaba ar sngi, ka la wan lut naduh ki Formation Commanders, Battalion Commander bad ki ophisar rangbah ban ïamir jingmut halor ki mat ba kongsan jong ka jingtreikam,bad ki mat treikam kiba ïadei bad ki bor pahara ha ka Ri.
Katkum ka kyrwoh la ong ba ka jingïalang ka la ai ïa ka rynsan ban khmih bniah ïa ka jinglong jingman jong ki bor ïada, ban khmih bniah ïa ki jingpynkhreh ha ka jingtreikam, bad ban thaw ïa ki lad ki lynti ban weng ïa ki jingeh kiba mih kiba ïadei bad ki lad jingïada.
“La kham banjur halor ka jingpynkhlaiñ ïa ki jingtreikam ha ki jaka khappud ha shilynter u pud hapdeng ka India bad Myanmar, ban pynkhlain ïa ki lad ban ïaleh pyrshah ïa ki kam lehnoh, bad ban pyntikna ïa ka jingpynkhreh lypa jong ka kynhun shipai,” ong ka kyrwoh.
Shuh shuh la ïathuh ba ka jingïatai ka la pynleit jingmut ruh halor ka jingpynkylla ïa ka tnad katkum ka juk kaba mynta, ka jingwanrah ïa ki tiar ïaleh bad ki tiar treikam kiba kham bha, ka jingpynrung ïa ki kor ki bor teknoliji kiba dang mih, ka jingpynkhlain ïa ka jingïatreilang bad ka jingïasngewthuh jingmut hapdeng ki tnad.
“Ha ka jingïalang, la ïatai ruh halor ki jingai jinghikai, ki jingpyntbit ïa ka jingtreikam, ka jingpynbha ïa ki jingtei bad ki lad jingïarap, kiba thmu ban kyntiew ïa ka jingtreikam bha jong ka tnad baroh kawei,” la bynrap biang ka kyrwoh.
U Lt Gen Vikas Lakhera, AVSM, SM, Director General Assam Rifles, u la khmih bniah ïa ki ïa ki jingjop ha ka jingtreikam jong ki kynhun bapher bapher, bad u la ai jingmut halor ki mat treikam kiba kongsan nakabynta ki por ki ban wan. U la ai khublei ïa ka jingtrei shitom, ka jingtbit bad ka jingaiti jong baroh ki kyrdan ha kaba pynneh ïa ka jingsuk bad jingshngain hapoh ki rukom treikam kiba eh.
U la banjur ruh ïa ka jingdonkam jong ka jinglah ban pynïadei, ka jingkiew ha ka juk teknoloji bad ka jingïai peitngor ha ka jingtreikam ban ïaleh ïa ki jingeh kiba nang mih ha ka kam ban ïada.
Ka jingïalang ka la pyn long ruh ïa ka jingïakylliang ïa ki rukom treikam kiba bha tam, ki rukom treikam kiba thymmai, bad ki jingshem jong ki nongïalam hapdeng ka jingtreikam. La pynkut ïa ka jingïalang da ki jingmut kiba thymmai ban pynkhlain ïa ki bor treikam, ban ïada ïa ka jingshngain jong ka ri bad ban bat ïa ki riti dustur kiba ha khlieh duh jong ka Assam Rifles ha ka jingshakri ïa ka Ri. (PIB)