Ngeit skhem u Conrad ban ïoh rung ka jylla ha ka Genius Book of World Record

Shillong, Naiwieng 14: U Myntri Rangbah ka jylla u Conrad K Sangma u la pynpaw ïa ka jingkyrmen ba ka Jylla Meghalaya kan ioh rung hapoh ka thup jong ka Genius Book of Worl Record ïa ka jingtem shih ajar tylli ki Ksing ha Wangala Festival kaba dei ka tamasa bah eh bha jong ka ri lum Garo.
Haba kren ha ki lad pathai khubor u Conrad u la ong, Ngi lah dep ban pynbiang ïa ki jingdonkam ban kin wan hangne bad ngi ngeit skhem ban ioh rung hapoh ka Genius Book of Worl Record.
U la ong ka Cherry Blossom Festival lah dep ban plie pyrda bad na ka bynta ka Megong ruh kan sa don ka jingpynbna bad ka Wangala kadei kaba ïapher namar ka ïadei bad ka riti ka dustur bad ka kolshor ba ngi don.
“Ha ka Wangala Frstival ngi don ki kynhun kiba dei na kiwei pat ki jylla jong ka ri kiba la wan ïa shim bynta bad ka jingthmu kalong ba ka jaitbynriew Garo ki shong ki sah ha ki jylla bapher bapher jong ka ri bad wat sha kiwei pat ki ri” ong u Conrad.
U la ong, “Ngi don shibun bah ki Garo kiba shong basah ha Bangladesh bad ka jingkwah jong ngi ka long ba ngi dei ban pynim bad pynneh pynsah ïa la ka jong ka kolshor bad ngi kwah ban iohi ba ki briew la ki shong ki sah ha kano kano ka jaka kim dei ban klet ïa la ka jong ka tynrai bad kim dei ban klet ïa ka kolshor”.
Shuh shuh u la ong, “Kane kadei shi bynta ban kyntiew ïa ka da kaba ai mynsiem ïa ki ban wan ïa shim bynta ha kane bad ngin pyntikna ba la ki dei na kano kano ka ri ne ha ki jylla bapher bapher jong ka ri bad ha kaba kut hi kidei na ka jaitbynriew Garo”.
“Kane kadei ka Jubilee Ksiar ka jingdap 50 snem ka Wangala Festival ïa kaba la sdang naduh u snem1976 bad kumba phi tip kane kadei tamasa kaba heh tam eh jong ka jaitbynriew Garo bad namar ba kala kynjoh 50 snem sngi sngewdei ba rakhe ha ka rukom kadei eh”.
U Conrad u la ong, Ha kine snem kiba la leit ngi ju rakhe tang da ki shi spah tylli ki Ksing, hynrei mynta u snem ngi don haduh shi hajar tylli ki Ksing bad kane ka dei ba ki nongialam kiba la khlad noh u (Late) Purno A Sangma u don ka jingiohi jngai ba lada ngi don ka jingrakhe ba 50 snem ngi dei ban don shi hajar tylli ki Ksing.
Dei halor kane, ngi kmen bha mynta ban don ki shi hajar tylli ki Ksing ha kine ki saw sngi ba la leit noh ki long shisha kiba kordor ha kaba u Myntri Rangbah ka Assam u la wan hagne bad mynnin ngi don ïa u Lat ka jylla bad mynta ngi don ïa u Union Minister ba peit ïa ka tnad Arts and Culture bad Tourism jong ka ri India u Gagendra Singh Shekhawat, ong u Conrad.
Kane kadei ka jingrakhe kaba kmen bad nga ai khublei ïa baroh ki nongïa don bynta lang kiba la pynurlong ïa kane bad kane ka jingrakhe kala iaid beit iaid ryntih bad bun kiba la wan ban ïa shim bynta na ki paidbah u la ong.