Da ka shithi thungkam sha ki 213 ngut ki Asst. Professor bad Lecturer ba thymmai sam u MR bad Myntri

Shillong, Naiwieng 14 : U Myntri Rangbah ka Jylla, u Conrad K. Sangma, ha ka sngi Palei u la sam ïa ki shithi thung kam sha ki 213 ngut ki nonghikai college ba thymmai ban shimti kum ki Assistant Professor bad Lecturer ha ki kolej sorkar bapher bapher kiba don ha ka jylla ha ka jingïalang kaba long ha State Convention Centre, Shillong.
Haba kren ha ka jingïalang kaba la donlang naduh u Myntri ka tnad Pule Puthi, u Lahkmen Rymbui, ki heh ophisar jong ka tnad Pule Puthi bad kiwei kiwei, u Myntri Rangbah u la ai khublei ïa baroh 213 ngut ki nonghikai college kiba la shah jied. “Kane kam dei tang ka jingpyndep ïa ka kam ophis, hynrei ka dei ka sienjam kaba don bynta ban kyntiew ïa ka pule puthi ha ka kyrdan ba halor ha ka Jylla ha ki snem ban wan,” u la ong.
Ïa ka jingthung kam na ka bynta ki Assistant Professor bad Lecturer ha ki jait jingpule bapher bapher ha ki kolej sorkar la pynlong lyngba ka Meghalaya Education Recruitment Board.
U Myntri Rangbah u la ong ruh, “Ki nonghikai ki dei ka païa jong kano kano ka jaka ai jinghikai, bad ka jingpynkupbor ïa ki nonghikai ka long kaba donkam ban kyntiew ïa ka kyrdan pule puthi ha baroh kawei ka Jylla.”
U la ong ruh ba ka Sorkar kan bteng ban beit tyngka ha ka jingpynkupbor ïa ki briew bad ki jaka pule kiba don bynta ha ka lawei jong ka Jylla, da kaba trei ha ki rukom bapher bapher ban pynkylla bad pynbha ïa ka tnad Pule Puthi.
“Lyngba kine ki jingthung kam, ka Sorkar kam shym la pyndap tang ïa ki kam kiba lait, hynrei ka la shim ïa ka sienjam ban kyntiew ïa ka pule puthi ha ki kolej, ban pynïar ïa ki lad pule jong ki samla bad ban tei ïa ka rukom pule kaba ai jingmyntoi ïa baroh,” u la bynrap biang.
Haba ai khublei ïa ki 213 ngut ki nonghikai, u Myntri Rangbah u la ong ba ki kamram jong ki ha ki klas ki don ka bynta kaba khraw ban pynwandur ïa ka lawei jong ki samla ka Jylla. U la pynpaw ïa ka jingshaniah ba kin trei ïa la ki kamram da ka jingaiti lut bad ka jingshisha. U la kyntu ruh ïa ki nonghikai ban long kiba don jingishah bad jingsngewlem ïa ki khynnah pule.
Lah ruh ban kdew hangne ba ka Meghalaya Education Recruitment Board ka la ïoh pdiang haduh 3,185 tylli ki aplikeshon, bad hadien ka jingbishar bniah, la jied khatduh ïa 213 ngut ki kyrtong. Ka jingjied ka la long katkum ki kyndon ba la buh, ha kaba la bud ïa ki kyndon jong ka UGC, ryngkat bad ka jingïakren markhmat bad ki kyrtong, khnang ban pynthikna ïa ka jingjied kaba khuid bad kaba shong nongrim ha ka jinglah bad ka jingnang jingstad.
Kine ki 213 ngut ki nonghikai ba thymmai yn phah sha ki kolej sorkar bapher bapher ban pyndap ïa ki kam nonghikai kiba lait, ban pynïar ïa ki jait jingpule bad ban pynkhlaiñ ïa ka rukom ai jinghikai ha ki kolej kiba dang shu seng thymmai.
Ki kolej kiban ïoh ïa ki nonghikai ba thymmai ki kynthup ïa ka Kiang Nangbah Government College, Jowai; Tura Government College; Sohra Government College; Williamnagar Government College; bad Capt. Williamson Sangma Memorial Government College, Baghmara.
Ka Sorkar kan sdang ruh ïa ki stream Science bad Commerce ha Sohra Government College, Williamnagar Government College bad Capt. Williamson Sangma Memorial Government College, Baghmara. Katba ha College of Teacher Education, Rongkhon, yn sdang ïa ki stream Arts bad Commerce.
Nalor kata, ki kolej ba thymmai kum ka P.A. Sangma Model Degree College, Rongjeng; Patharkhmah Model Degree College, Patharkhmah; College of Science and Commerce, Mawphlang; bad College of Science and Commerce, Mahendraganj kin ïoh ruh ïa ki nonghikai ban pynkhlaiñ ïa ki jingpule bad ban pynïar ïa ki jingshakri ha kine ki jaka.