Syrtap ki lynti ïaid bad rud surok da kiba thied bad die syntiew ha kylleng ki jaka ka Shillong

Shillong, Naiwieng 14: Ki paidbah na kylleng ka jaka ki la tuid ha ka sngi saitjaiñ ban leit thied ïa ki syntiew na Motphran Shillong, na ka bynta ban leit buh syntiew ha ka sngi U Blei ka 15 tarik mynta u bnai na ka bynta ban leit buh ha ki lum jingtep ha ki parish bapher bapher bad kane ka jingleit buh syntiew ka long ruh kum shi sien shisnem ban kynmaw burom, ban duwai na ka bynta kiba haïing hasem kiba la khlad noh na kane ka pyrthei.
Ha ka sngi saitjaiñ baroh shi sngi ka Motphran ka la thnam da kiba wan ban thied ïa ki syntiew na ki jaka bapher bapher. Lah ban ong ba kiba die syntiew ki la wan ruh na ki jaka bapher bapher bad kane ka la long ka ïew kaba thnem bha ha kaba kane ruh kan ïarap ïa ki ban kyntiew ïa ka ïoh ka kot bad ka kamai kajih lyngba ki jingtrei shitom jong ki ban thaiñ ïa ki syntiew ha ki rukom pynitynnad bapher bapher bad kaba ïa ki syntiew ruh ki la rep bad sumar baroh shisnem bad kane kan long ruh ka lad kamai kaba ki ioh tang ha ka shisien shisnem ban pynïaid ïew ïa ki syntiew ba ki la thung ha la ki jong ki jaka jaka.
Watla ki syntiew ba ki la thaiñ bad kaba ki la die ki la long ha ki dor kiba jem bad ki bym da rem than, kiba bun ki paidbah ki la ïalum ban jied ïa ki kyntiew kaba ki mon ban rah sha la ki lum jingtep bad ban pynitynnad ïa ki ha ki rong bapher bapher.
Lah ban ong ba ka Balang Katholik manla u snem ka ju buh ba u bnai Naiwieng un dei u bnai ba ka Balang bad ki paid riewngeit ki ju kynmaw ïa la ki jong kiba ieid ba thoiñ kiba la khlad noh bad ban duwai ruh na ka bynta jong ki.
Ha kajuh ka por ka Balang ka la kyntu ruh ïa ki paidbah bad ki paid riewngeit ba haba ki leit ban buh ïa ki syntiew ki dei ban pyndonkam beit tang da ki syntiew kiba im bad ka la khang ruh ban pyndonkam ïa ki syntiew plastic, ki phong bad ki sponge bad kiwei kiwei kiba ktah bad pynjaboh ïa ka mariang bad ki jingkhuid jong ka.
Naduh na Motphran shaduh ka thaiñ Bimola ha shilynter jong ki lynti bad rud surok la ïohi ba la dap tang da kiba thied bad kiba die syntiew bad lah ban ong ba ha kane ka sngi kane ka thaiñ ka la dap tang da ki jingsma iwbih jong ki syntiew bad ka la phuh la itynnad da ki syntiew kiba bun rong bad kiba bun jait ba la wanrah bad thaiñ bad shna ha ki rukom bapher bapher.